എരുമേലി: സ്വകാര്യ ബസിൽ യാത്ര ചെയ്ത യുവതിയോട് മോശമായി പെരുമാറിയതായി ആരോപിച്ച് ജീവനക്കാരനെ മർദ്ദിക്കുകയും ബിയർ കുപ്പികൊണ്ട് തലക്കടിച്ച് പരിക്കേൽപ്പിക്കുകയും ചെയ്തതായി പരാതി. എരുത്വാപ്പുഴ സ്വദേശി സേതുവിനാണ് (അച്ചു – 21) മർദ്ദനമേറ്റത്. വ്യാഴാഴ്ച വൈകിട്ട് 5.30 ഓടെ എരുമേലി സ്വകാര്യ ബസ് സ്റ്റാൻഡിലാണ് സംഭവം. സ്റ്റാൻഡിൽ ബസ് നിർത്തിയിട്ട ശേഷം ജീവനക്കാർ പുറത്തേക്ക് ഇറങ്ങി കുറച്ച് നേരത്തിനു ശേഷം രണ്ട് യുവാക്കളെത്തി സേതുവിനെ മർദ്ദിക്കുകയായിരുന്നു.
യുവാക്കളിൽ ഒരാളുടെ സഹോദരിയോട് മോശമായി സംസാരിച്ചെന്ന് ആരോപിച്ചാണ് ഇവർ ക്രൂരമായി മർദ്ദിച്ചത്. യുവാക്കൾ കരുതിയിരുന്ന ബിയർ കുപ്പികൊണ്ട് സേതുവിന്റെ തലയ്ക്ക് അടിച്ചതായും യാത്രക്കാർ പറഞ്ഞു. നിരവധിയാളുകൾ നോക്കിനിൽക്കെയാണ് മർദ്ദനം. പരിക്കേറ്റ സേതുവിനെ എരുമേലി സാമൂഹികാരോഗ്യ കേന്ദ്രത്തിൽ എത്തിച്ചു. കേസെടുത്ത് അന്വേഷിക്കുമെന്ന് എരുമേലി എസ്.ഐ അനീഷ് പറഞ്ഞു.
