ഇന്ത്യയ്ക്ക് മൂന്നാം വട്ടം മിസ് യൂണിവേഴ്‌സ് പട്ടം; രണ്ടു പതിറ്റാണ്ടിന് ശേഷം ചരിത്രം സൃഷ്ടിച്ച് ഇന്ത്യൻ സുന്ദരി; ഹർനാസ് സന്ധു മിസ് യൂണിവേഴ്‌സ്

ജറുസലേം: രണ്ടു പതിറ്റാണ്ടിന്റെ ചരിത്രം തിരുത്തി ഇന്ത്യൻ സുന്ദരി. മിസ് യൂണിവേഴ്‌സ് പട്ടത്തിൽ 80 രാജ്യങ്ങളിൽ നിന്നുള്ളവരെ പിൻതള്ളിയാണ് ഇപ്പോൾ ഇന്ത്യക്കാരി വിജയം നേടിയിരിക്കുന്നത്. 21 വർഷത്തിന് ശേഷമാണ് ഒരു ഇന്ത്യക്കാരി മിസ് യൂണിവേഴ്‌സായി തിരഞ്ഞെടുക്കപ്പെടുന്നത്. അഭിനയേത്രിയും മോഡലുമായ ഹർനാസ് സന്ധുവാണ് ഇന്ത്യയ്ക്ക് വേണ്ടി കിരീടം നേടി വിജയം സ്വന്തമാക്കിയത്.

സന്ധുവിന് മുമ്പ് രണ്ട് ഇന്ത്യക്കാർ മാത്രമേ മിസ് യൂണിവേഴ്‌സ് പട്ടം നേടിയിട്ടുള്ളൂ 1994-ൽ സുസ്മിതാ സെന്നും 2000-ൽ ലാറ ദത്തയും. ലാറാ ദത്തയ്ക്ക് ശേഷം ആദ്യമായാണ് ഇന്ത്യയിൽ വിജയ കിരീടം എത്തുന്നത്. മിസ് യൂണിവേഴ്‌സിന്റെ 70-ാമത് എഡിഷൻ ഇസ്രായേലിലെ എയ്ലാറ്റിൽ നടന്നത്. ഈ വേദിയിലാണ് 21 കാരിയായ ഇന്ത്യക്കാരി വിജയം സ്വന്തമാക്കിയിരിക്കുന്നത്.

പബ്ലിക് അഡ്മിനിസ്‌ട്രേഷനിൽ ബിരുദാനന്തര ബിരുദമുള്ളചണ്ഡീഗഡ് സ്വദേശിയാണ് ഹർനാസ് സന്ധു. 2020 ലെ മത്സരത്തിൽ വിജയിച്ച മെക്‌സിക്കോയിലെ മുൻഗാമി ആൻഡ്രിയ മെസയാണ് സന്ധുവിനെ കിരീടം ചൂടിച്ചത്. പരാഗ്വെയുടെ നാദിയ ഫെരേര (22) രണ്ടാം സ്ഥാനത്തെത്തിയപ്പോൾ ദക്ഷിണാഫ്രിക്കയുടെ 24 കാരിയായ ലാലേല മസ്വനെ മൂന്നാം സ്ഥാനത്തെത്തി.

അവസാന ചോദ്യോത്തര റൗണ്ടിൽ, യുവതികൾ ഇന്ന് നേരിടുന്ന സമ്മർദ്ദത്തെ എങ്ങനെ നേരിടണം എന്നതിനെക്കുറിച്ച് എന്ത് ഉപദേശം നൽകുമെന്നായിരുന്നു ചോദ്യം. ഇതിനുള്ള മറുപടിയാണ് ഇവരെ വിജയകീരീടത്തിലേയ്ക്ക് എത്തിച്ചത്. ‘ഇന്നത്തെ യുവാക്കൾ നേരിടുന്ന ഏറ്റവും വലിയ സമ്മർദ്ദം സ്വയം വിശ്വസിക്കുക എന്നതാണ്, നിങ്ങൾ അതുല്യനാണെന്നും അതാണ് നിങ്ങളെ സുന്ദരിയാക്കുന്നത്. മറ്റുള്ളവരുമായി നിങ്ങളെ താരതമ്യം ചെയ്യുന്നത് നിർത്തുക, ലോകമെമ്പാടും നടക്കുന്ന കൂടുതൽ പ്രധാനപ്പെട്ട കാര്യങ്ങളെക്കുറിച്ച് നമുക്ക് സംസാരിക്കാം. ഇതാണ് നിങ്ങൾ. മനസിലാക്കണം, പുറത്തുവരൂ, സ്വയം സംസാരിക്കൂ, കാരണം നിങ്ങൾ നിങ്ങളുടെ ജീവിതത്തിന്റെ നേതാവ്, നിങ്ങൾ നിങ്ങളുടെ സ്വന്തം ശബ്ദമാണ്, ഞാൻ എന്നിൽ വിശ്വസിച്ചു, അതുകൊണ്ടാണ് ഞാൻ ഇന്ന് ഇവിടെ നിൽക്കുന്നത്,’ ഇടിമുഴക്കത്തോടെ അവൾ പറഞ്ഞു.

17-ാം വയസ്സിൽ ചണ്ഡീഗഢിനെ പ്രതിനിധീകരിച്ച് 2017-ൽ ടൈംസ് ഫ്രെഷ് ഫേസ് നേടിയതോടെയാണ് സന്ധു മത്സരരംഗത്ത് തന്റെ യാത്ര ആരംഭിച്ചത്. പിന്നീട് ലിവ മിസ് ദിവ യൂണിവേഴ്‌സ് 2021 കിരീടം അവർ നേടി. ‘യാര ദിയാൻ പൂ ബാരൻ’, ‘ബായ് ജി കുട്ടാങ്കേ’ എന്നിവയുൾപ്പെടെ ഏതാനും പഞ്ചാബി ചിത്രങ്ങളിലും സന്ധു അഭിനയിച്ചിട്ടുണ്ട്. സ്റ്റീവ് ഹാർവി ആതിഥേയത്വം വഹിച്ച ചടങ്ങിൽ അമേരിക്കൻ ഗായകൻ ജോജോയുടെ പരിപാടികളും നടന്നു.

സെലക്ഷൻ കമ്മിറ്റിയിൽ അഭിനേതാവും മിസ് യൂണിവേഴ്‌സ് ഇന്ത്യ 2015 ഉർവശി റൗട്ടേല, അഡമാരി ലോപ്പസ്, അഡ്രിയാന ലിമ, ചെസ്ലി ക്രിസ്റ്റ്, ഐറിസ് മിറ്റനേരെ, ലോറി ഹാർവി, മരിയൻ റിവേര, റെന സോഫർ എന്നിവരും ഉൾപ്പെടുന്നു.