ജനപ്രിയ നടൻ ദില്ലി ഗണേഷിന്റെ വിയോഗത്തില്‍ അനുശോചനം രേഖപ്പെടുത്തി നടൻ മോഹൻലാല്‍. പതിറ്റാണ്ടുകള്‍ നീണ്ട അഭിനയ ജീവിതത്തില്‍ വിവിധ ഭാഷകളിലായി നിരവധി കഥാപാത്രങ്ങള്‍ അവതരിപ്പിച്ച അതുല്യ പ്രതിഭയാണെന്നും അദ്ദേഹത്തിന്റെ വേർപാടില്‍ വേദനയുണ്ടെന്നും മോഹൻലാല്‍ ഫെയ്സ്ബുക്കില്‍ കുറിച്ചു. പതിറ്റാണ്ടുകളായി വിവിധ ഭാഷകളില്‍ വ്യത്യസ്തങ്ങളായ എത്രയോ കഥാപാത്രങ്ങളെയാണ് അദ്ദേഹം അവതരിപ്പിച്ചത്. ദേവാസുരം, കാലാപാനി, കീർത്തിചക്ര, ഇരുവർ തുടങ്ങിയ നിരവധി ചിത്രങ്ങളില്‍ അദ്ദേഹത്തോടൊപ്പം അഭിനയിക്കാൻ സാധിച്ചു.
വാർദ്ധക്യ സഹജമായ അസുഖത്തെ തുടർന്ന് ചികിത്സയില്‍ കഴിയുന്നതിനിടെ ഇന്നലെ രാത്രിയാണ് മുതിർന്ന നടൻ അന്തരിച്ചത്. ചെന്നൈയിലെ രാമപുരം സെന്തമിഴ് നഗറിലെ വസതിയില്‍ വച്ചായിരുന്നു അന്ത്യം. 400-ലേറെ സിനിമകളില്‍ അഭിനയിച്ച ദില്ലി ഗണേഷ് തമിഴിന് പുറമെ തെലുങ്ക്, മലയാളം സിനിമകളിലും മികച്ച കഥാപാത്രങ്ങള്‍ ചെയ്തിട്ടുണ്ട്.
