കോട്ടയം : അയൽവാസിയുടെ വീട്ടിൽ ജോലിക്ക് വന്ന ആളെ വെട്ടി കൊലപ്പെടുത്താൻ ശ്രമിച്ച കേസിലെ പ്രതിയെ പോലീസ് അറസ്റ്റ് ചെയ്തു. നാട്ടകം മൂലവട്ടം പുത്തൻപറമ്പിൽ വീട്ടിൽ രാജപ്പൻ മകൻ മനോജ് (36) എന്നയാളെയാണ് ചിങ്ങവനം പോലീസ് അറസ്റ്റ് ചെയ്തത്.പ്രതിയായ മനോജിന്റെ വീടിന് മുൻവശമുള്ള പൊതു ടാപ്പിൽ നിന്നും അയൽവാസിയായ യുവതി വെള്ളമെടുത്തത് തടഞ്ഞ മനോജിനെ യുവതി ചോദ്യം ചെയ്യുകയും, പ്രതിക്കെതിരെ ചിങ്ങവനം സ്റ്റേഷനിൽ നാട്ടുകാർ പരാതി കൊടുത്തതിൽ യുവതി ഒപ്പുവയ്ക്കുകയും ചെയ്തിരുന്നു.
ഇതിനോടുള്ള വിരോധം മൂലം മനോജ് യുവതിയെ ചീത്ത വിളിക്കുകയും, ഭീഷണിപ്പെടുത്തുകയും ലൈംഗികചു വയുള്ള ആംഗ്യങ്ങൾ കാണിക്കുകയും ചെയ്തിരുന്നു.ഇതും യുവതി പോലീസില്‍ പരാതി നല്‍കിയിരുന്നു. ഇതിനെ തുടർന്ന് ഇരുവരും തമ്മില്‍ ശത്രുത നിലനിന്നിരുന്നു. കഴിഞ്ഞദിവസം യുവതിയുടെ വീട്ടിൽ ജോലിക്ക് വന്ന ശശീന്ദ്രൻ എന്നയാളെ യുവതിയോടുള്ള വിരോധം മൂലം മനോജ് അരിവാളുകൊണ്ട് വെട്ടി കൊലപ്പെടുത്താൻ ശ്രമിക്കുകയായിരുന്നു.ഇതിനെ തുടര്‍ന്ന് പോലീസ് കേസ് രജിസ്റ്റർ ചെയ്യുകയും പ്രതിയെ അറസ്റ്റ് ചെയ്യുകയുമായിരുന്നു . ചിങ്ങവനം സ്റ്റേഷൻ എസ്.എച്ച്. ഓ ജിജു ടി.ആർ,എസ്.ഐ അനീഷ്, സി.പി.ഓ മാരായ മണികണ്ഠൻ,സതീഷ്, സലമോൻ,ലൂയിസ് പോൾ എന്നിവർ ചേർന്നാണ് ഇയാളെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കി.
