കോട്ടയം : കോട്ടയത്തെ റുമാറ്റിക് ഫീവര്‍ രഹിത ജില്ലയായി പ്രഖ്യാപിച്ച് റുമാറ്റിക് ഹാര്‍ട്ട് ക്ലബ്ബ്. കോട്ടയം ജില്ലയില്‍ 2024 ല്‍ ഒറ്റ റുമാറ്റിക് ഫീവര്‍ രോഗിയെ പോലും കണ്ടെത്തിയിട്ടില്ല. ഈ സാഹചര്യത്തില്‍ മെഡിക്കല്‍ കോളേജില്‍ നടന്ന ചടങ്ങില്‍ ക്ലബിന്റെ 27-ാം വാര്‍ഷിക സമ്മേളനത്തോട് അനുബന്ധിച്ചായിരുന്നു പ്രഖ്യാപനം.റുമാറ്റിക് ഹൃദ്രോഗ നിയന്ത്രണത്തിനായി പ്രവര്‍ത്തനം നടത്തുന്ന ഡോക്ടര്‍മാരുടെയും, റുമാറ്റിക് ഹൃദ്രോഗം വന്ന രോഗികളുടെയും, കുടുംബാംഗങ്ങളുടെയും സംഘടനയായ റുമാറ്റിക് ഹാര്‍ട്ട് ക്ലബ്ബ്. ഇതിന്റെ വാര്‍ഷികത്തോടനുബന്ധിച്ചായിരുന്നു കോട്ടയത്തെ റുമാറ്ററിക് ഫീവര്‍ രഹിത ജില്ലയായി പ്രഖ്യാപിച്ചത്. കഴിഞ്ഞ വര്‍ഷം, കേരളത്തില്‍ ആകെ 14 റുമാറ്റിക്കു ഫീവര്‍ രോഗികളെയാണ് കണ്ടെത്തിയത്. ഇതില്‍ കോട്ടയം ജില്ലയില്‍ നിന്ന് ഒരുരോഗി പോലും ഉണ്ടായിരുന്നില്ല. ഇത് കൃത്യമായ പ്രതിരോധത്തിന്റെ ഭാഗമാണെന്ന് ഡോക്ടര്‍മാര്‍ പറയുന്നു.റൂമാറ്റിക്ക് ഫീവര്‍ പൂര്‍ണ്ണമായി ഒരു ജില്ലയിലും നിയന്ത്രണ വിധേയമായി ഇതു വരെ രാജ്യത്ത് റിപ്പോര്‍ട്ട് ചെയ്തിട്ടില്ല. അതുകൊണ്ടു തന്നെ കോട്ടയം ജില്ലയുടെയും കേരളത്തിന്റെയും ഈ നേട്ടം വളരെ പ്രാധാന്യം അര്‍ഹിക്കുന്നു.
