ന്യൂസ് ഡെസ്ക് : അവഗണനകള്‍ക്കും ഒഴിവാക്കലുകള്‍ക്കും പഴികേള്‍ക്കലുകള്‍ക്കും ശേഷമാണ് മലയാളികളുടെ സ്വന്തം സഞ്ജു ലോകകപ്പ് ടീമില്‍ ഇടംപിടിച്ചിരിക്കുന്നത്.നീണ്ട 9 വർഷത്തെ കരിയറില്‍ ഇത് ആദ്യമായാണ് ലോകകപ്പ് ടീമിലേക്ക് സഞ്ജു എത്തുന്നത്. ഇന്നലെ എക്‌സിലൂടെയാണ് ബിസിസിഐ ലോകകപ്പിനുള്ള 15 അംഗ ടീമിനെ പ്രഖ്യാപിച്ചത്. പിന്നാലെ സഞ്ജുവിന്റെ പ്രതികരണവും വന്നു.
‘വിയർപ്പു തുന്നിയിട്ട കുപ്പായം’ എന്ന അടിക്കുറിപ്പോടെ ഇന്ത്യൻ ടീമിന്റെ ജാക്കറ്റ് ധരിച്ച്‌ നില്‍ക്കുന്ന ചിത്രമാണ് ഇൻസ്റ്റഗ്രാമില്‍ സഞ്ജു പങ്കുവച്ചത്. മഞ്ഞുമ്മല്‍ ബോയ്സ് എന്ന സിനിമയിലെ ഒരു ഗാനത്തിന്റെ ആദ്യ വരിയാണിത്. തന്റെ കഴിവ് കൊണ്ട് നേടിയ അംഗീകാരത്തെ സൂചിപ്പിച്ച്‌ സഞ്ജു കുറിച്ച വാക്കുകള്‍ ആരാധകരും ഏറ്റെടുത്ത് കഴിഞ്ഞു. ഐപിഎല്ലില്‍ മികച്ച പ്രകടനം പുറത്തെടുക്കുന്ന സഞ്ജുവിനെ അവഗണിക്കാൻ സെലക്ടർമാർക്കുമായില്ല.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
വിയർപ്പു തുന്നിയിട്ട കുപ്പായം…
അതില്‍ നിറങ്ങള്‍മങ്ങുകയില്ല കട്ടായം
കിനാവു കൊണ്ടുകെട്ടും കൊട്ടാരം
അതില്‍ മന്ത്രി നമ്മള്‍ തന്നെ രാജാവും
ചെറിയ ഭൂമിയില്ലേ വിധിച്ചത് നമക്ക്
ഉച്ചികിറുക്കില്‍ നീ ഉയരത്തില്‍ പറക്ക്
ചേറില്‍ പൂത്താലും താമര കണക്ക്
ചോറ് പോരെ മണ്ണില്‍ ജീവിക്കാൻ നമ്മക്ക്…
എന്നീ വരികളടങ്ങുന്ന പാട്ടാണ് പോസ്റ്റില്‍ ബാക്ക്ഗ്രൗണ്ട് സ്‌കോറായി പങ്കുവച്ചിരിക്കുന്നത്. ഇത് സഞ്ജുവിന് വേണ്ടി എഴുതിയ വരികള്‍ പോലെയുണ്ട്, ഒറ്റക്കു വഴിവെട്ടി വന്നവനാടാ, ഹമാരാ ക്യാപ്റ്റൻ കേസാ ഹോ? സഞ്ജു സാംസണ്‍ ജെസാ ഹോ, എന്നീ കമന്റുകളാണ് പോസ്റ്റിന് താഴെ ആരാധകർ പങ്കുവച്ചിരിക്കുന്നത്.
9 ഇന്നിംഗ്‌സില്‍ നിന്ന് 77 ശരാശരിയില്‍ 385 റണ്‍സുമായി സ്‌ട്രൈക്ക് റേറ്റില്‍ രണ്ടാമതും റണ്‍ വേട്ടക്കാരുടെ പട്ടികയില്‍ ആറാമതുമാണ് ഈ മല്ലുബോയ്. സീസണില്‍ ഒമ്ബത് മത്സരങ്ങളില്‍ 8ലും ടീമിന് വിജയം സമ്മാനിച്ച നേതൃമികവിലും തിളങ്ങുകയാണ് സഞ്ജുവെന്ന നായകൻ.
