പാലക്കാട്: ബിജെപി നേതാവ് സന്ദീപ് വാര്യർ സിപിഎമ്മിലേക്കെന്ന് സൂചന. ബിജെപിയുമായി ഇടഞ്ഞു നിൽക്കുന്ന അദ്ദേഹം സിപിഎം നേതാക്കളുമായി ചർച്ച നടത്തിയെന്നാണ് പുറത്തുവരുന്ന വിവരങ്ങൾ.
കഴിഞ്ഞ ദിവസം പാലക്കാട്ടെ എൻഡിഎ സ്ഥാനാർഥി സി.കൃഷ്ണകുമാറിൻറെ തെരഞ്ഞെടുപ്പ് കൺവൻഷനിൽ അദ്ദേഹത്തിന് സ്റ്റേജിൽ ഇരിപ്പിടം നൽകിയിരുന്നില്ല.
നിരവധി മുതിർന്ന നേതാക്കൾ പങ്കെടുത്ത കൺവൻഷനിൽ അണികളോടൊപ്പം വേദിയിലായിരുന്നു സന്ദീപ് ഇരുന്നത്. തുടർന്ന് അദ്ദേഹം തെരഞ്ഞെടുപ്പ് പ്രചാരണങ്ങളിൽ നിന്ന് വിട്ടു നിൽക്കുകയായിരുന്നു. അതേസമയം സന്ദീപ് വാര്യർക്ക് മുന്നിൽ വാതിൽ തുറന്നിട്ടിരിക്കുകയാണെന്ന് സിപിഎം നേതാവ് എ.കെ.ബാലൻ പറഞ്ഞു. സന്ദീപ് വാര്യർ നിലപാട് വ്യക്തമാക്കിയാൽ സിപിഎം ചർച്ച ചെയ്യും.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
സന്ദീപ് വാര്യർ നല്ല നേതാവാണ്. നിലപാടുകൾ വെട്ടിത്തുറന്നു പറയുന്നയാളാണ്. ബിജെപിയിൽ നിൽക്കാൻ സന്ദീപിന് ബുദ്ധിമുട്ടുണ്ടെന്നും എ.കെ.ബാലൻ പറഞ്ഞു. പാലക്കാട് ഉപതെരഞ്ഞെടുപ്പ് സ്ഥാനാർഥി പട്ടികയിൽ സന്ദീപ് വാര്യരുടെ പേര് ഉണ്ടായിരുന്നു. നിലവിൽ പ്രചാരണ പരിപാടികളിൽ നിന്ന് വിട്ടു നിൽക്കുന്ന സന്ദീപ് വാര്യരെ അനുനയിപ്പിക്കാൻ പാർട്ടി നീക്കം നടത്തിയെങ്കിലും വിജയിച്ചില്ല.
സന്ദീപും സി.കൃഷ്ണകുമാറും തമ്മിൽ ചില തർക്കങ്ങൾ നില നിന്നിരുന്നു. ഇതേ തുടർന്നാണ് തെരഞ്ഞെടുപ്പ് കൺവൻഷനിൽ വേണ്ട പ്രധാന്യം കിട്ടാതെ പോയതെന്നും ഒരു വിഭാഗം പറയുന്നു. കൺവൻഷനിൽ മുതിർന്ന നേതാക്കൾക്കൊപ്പം തനിക്ക് സീറ്റ് നൽകണമെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ അറിയിച്ചിട്ടും തന്നെ അവഗണിച്ചുവെന്നാണ് സന്ദീപ് വാര്യർ പറയുന്നത്.
കൺവൻഷനിൽ പാർട്ടി അണികളോടൊപ്പം വേദിയിൽ ഇരിക്കേണ്ടി വന്നതിന് പിന്നാലെയാണ് സന്ദീപ് പ്രചാരണ ചുമതലകളിൽ നിന്ന് പിന്മാറിയത്. നേരത്തെ കൃഷ്ണകുമാറിന് വേണ്ടിയുള്ള പ്രചാരണത്തിൽ വലിയ രീതിയിൽ സന്ദീപ് വാര്യർ മുന്നിലുണ്ടായിരുന്നു.
1991ൽ പാലക്കാട് മുനിസിപ്പൽ ചെയർമാൻ തെരഞ്ഞെടുപ്പിൽ സിപിഎം നേതാവും മുൻ ചെയർമാനുമായിരുന്ന എം.എസ്.ഗോപാലകൃഷ്ണൻ അന്നത്തെ ബിജെപി ജില്ലാ പ്രസിഡൻറ് ടി.ചന്ദ്രശേഖരന് അയച്ച കത്ത് പുറത്തുവിട്ടത് സന്ദീപ് വാര്യരായിരുന്നു. 2021 ലെ നിയമസഭാ തെരഞ്ഞെടുപ്പിൽ എൻഡിഎ സ്ഥാനാർഥിയായി ഷൊർണൂരിൽ നിന്ന് മത്സരിച്ച അദ്ദേഹം 36973 വോട്ട് നേടിയിരുന്നു.
