കോട്ടയം : പരുത്തുംപാറക്കവലയിൽ എക്സൈസ് സംഘത്തിനു നേരെ കുരുമുളക് സ്പ്രേ അടിച്ച് രക്ഷപെടാനുള്ള യുവാക്കളുടെ ശ്രമം പാളി . കഞ്ചാവുമായി രണ്ടു യുവാക്കളെ എക്സൈസ് സർക്കിൾ ഇൻസ്പെക്ടർ സിബി ഇ പി യുടെ നേതൃത്വത്തിലുള്ള സംഘം പിടികൂടി . ഡിസം: 12 ചൊവ്വാഴ്ച ഉച്ചകഴിഞ്ഞ് 3 മണിയോടുകൂടി സ്കൂട്ടറിൽ സഞ്ചരിക്കുകയായിരുന്ന രണ്ടു യുവാക്കളിൽ ഒരാൾ പരുത്തുംപാറക്കവലയിൽ വച്ച് , ജീപ്പിലെത്തിയ എക്സൈസ് പട്രോളിംഗ് സംഘത്തെ കണ്ട് ഇറങ്ങിയോടി . ജീപ്പിൽ നിന്നിറങ്ങിയ സംഘാംഗങ്ങൾ സ്കൂട്ടറിലിരുന്നയാളെ തടഞ്ഞു നിർത്തി . ഓടിപ്പോയ യുവാവിനെ പിൻതുടർന്ന എക്സൈസ് ഉദ്യോഗസ്ഥർക്കു നേരെ ഇയാൾ കുരുമുളക് സ്പ്രേ പ്രയോഗിക്കുകയായിരുന്നു . രണ്ടു പേരെയും പിടികൂടി പരിശോധിച്ചതിലും വാഹനത്തിൽ നിന്നും കഞ്ചാവു പൊതികൾ കണ്ടെടുക്കുകയായിരുന്നു. ചിങ്ങവനം പോളച്ചിറ സ്വദേശി വിഷ്ണു മോഹൻ (22 ) , പനച്ചിക്കാട് നെല്ലിക്കൽ സ്വദേശി സച്ചിൻ (23) എന്നിവരെയാണ് എക്സൈസ് സംഘം പിടികൂടിയത് . ഇവർക്ക് കഞ്ചാവു കൈമാറിയ യുവാവിന്റെ നെല്ലിക്കൽ പുതുപ്പറമ്പ് ഭാഗത്തെ ഒരു വീട്ടിൽ എക്സൈസ് സംഘം പരിശോധന നടത്തിയെങ്കിലും ഒന്നും കണ്ടെടുക്കുവാനായില്ല . പരുത്തുംപാറ , സദനം , നീലഞ്ചിറ , നെല്ലിക്കൽ എന്നിവിടങ്ങളിൽ കഞ്ചാവ് ഉപയോഗിക്കുന്ന സംഘങ്ങൾ വ്യാപകമാണ് . ഇവർക്ക് രാഷ്ട്രീയ പാർട്ടി യുവജന സംഘടനകളുടെ ഒത്താശ ലഭിക്കുന്നതായും ആരോപണമുണ്ട്.
