പത്തനംതിട്ട: പത്തനംതിട്ട മൈലപ്രയിലെ വായോധികനായ വ്യാപാരിയുടെ കൊലപാതകം അന്വേഷിക്കാൻ പ്രത്യേക സംഘം. അന്വേഷണം ഊര്‍ജിതമാക്കാൻ എസ് പിയുടെ മേല്‍നോട്ടത്തിലാണ് പ്രത്യേക സംഘം രൂപീകരിച്ചത്. കോട്ടയം മെഡിക്കല്‍ കോളേജില്‍ മൃതദേഹം ഇന്ന് പോസ്റ്റ്‌ മോര്‍ട്ടം നടത്തും. അന്വേഷണത്തില്‍ വൻ ആസൂത്രണം നടത്തിയാണ് കൊല നടത്തിയതെന്ന് വ്യക്തമായിരുന്നു. വായില്‍ തുണി തിരുകി, കൈകാലുകള്‍ കെട്ടിയ നിലയിലാണ് കടയ്ക്കുള്ളില്‍ ജോര്‍ജ് ഉണ്ണുണ്ണിയുടെ മൃതദേഹം കണ്ടെത്തിയത്. കഴുത്തില്‍ കിടന്ന സ്വര്‍ണ്ണ മാലയും കാണാതായിട്ടുണ്ട്. മോഷണത്തിനിടെ ഉണ്ടായ കൊലപാതകം എന്നാണ് നിഗമനം. കൂടുതല്‍ അന്വേഷണങ്ങള്‍ക്കു ശേഷമെ മറ്റു വിശദാംശങ്ങള്‍ വ്യക്തമാകുകയുള്ളുവെന്ന് പൊലീസ് പറഞ്ഞു. പൊലീസ് പരിശോധനയില്‍ കടയിലെ സിസിടിവിയുടെ ഹാര്‍ഡ് ഡിസ്ക് കാണാനില്ലെന്ന് വ്യക്തമായി. മോഷണ ശ്രമത്തിനിടെയുള്ള കൊലപാതകമാണെന്നാണ് സംശയിക്കുന്നത്. സിസിടിവി ദൃശ്യങ്ങള്‍ ഉള്‍പ്പെടെ പരിശോധിച്ച്‌ അന്വേഷണം നടത്തുകയാണ് പൊലീസ്. മൈലപ്രയില്‍ ഏറെക്കാലമായി കച്ചവടം നടത്തുന്ന വ്യക്തിയാണ് ജോര്‍ജ്. സ്റ്റേഷനറി സാധനങ്ങളും മറ്റു വീട്ടുസാധനങ്ങളും പഴങ്ങളും ഉള്‍പ്പെടെയുള്ളവ വില്‍ക്കുന്ന കടയിലാണ് സംഭവം.
പത്തനംതിട്ട മൈലപ്രയിലെ വായോധികന്റെ കൊപാതകം: അന്വേഷിക്കാൻ പ്രത്യേക സംഘം
