റാന്നി : അങ്ങാടി, കോട്ടാങ്ങല്‍ പഞ്ചായത്തുകളിലെ സമഗ്ര കുടിവെള്ള വിതരണ പദ്ധതികളുടെ നിര്‍മാണ ഉദ്ഘാടനം മേയ് അഞ്ചിന് ജലവിഭവ വകുപ്പ് മന്ത്രി റോഷി അഗസ്റ്റിന്‍ നിര്‍വഹിക്കുമെന്ന് അഡ്വ. പ്രമോദ് നാരായണ്‍ എംഎല്‍എ അറിയിച്ചു. രാവിലെ 9.30ന് അങ്ങാടി പഞ്ചായത്ത് ഓഫീസ് അങ്കണത്തില്‍ അങ്ങാടി പദ്ധതിയുടെയും രാവിലെ 10ന് കോട്ടാങ്ങല്‍ കുളത്തൂരില്‍ കോട്ടാങ്ങല്‍ കുടിവെള്ള പദ്ധതിയുടെയും ഉദ്ഘാടനം നിര്‍വഹിക്കും. ജല്‍ ജീവന്‍ പദ്ധതിയില്‍ ഉള്‍പ്പെടുത്തിയാണ് ഇവിടെ ജലവിതരണം നടത്തുന്നത്.
കോട്ടാങ്ങല്‍ പഞ്ചായത്തിലെ വിതരണത്തിന് 33.13 കോടി രൂപയുടെ പ്രവൃത്തികളാണ് ടെന്‍ഡര്‍ ചെയ്തത്. നിലവിലുള്ള പെരുമ്പാറ, മലമ്പാറ പദ്ധതികള്‍ കേന്ദ്രീകരിച്ചാണ് ഇപ്പോള്‍ ജലവിതരണ കുഴലുകള്‍ സ്ഥാപിക്കുന്നത്. കോട്ടാങ്ങല്‍ – ആനിക്കാട് കുടിവെള്ള പദ്ധതി വരുന്നതോടെ ഈ രണ്ട് പദ്ധതികളും ആ പദ്ധതിയുമായി ലയിക്കും. തുടര്‍ന്ന് ട്രീറ്റ്‌മെന്റ് ചെയ്ത വെള്ളം ഇവിടേക്ക് എത്തിക്കാനും ആകും. 4106 ഹൗസ് കണക്ഷനുകള്‍ ആണ് പദ്ധതി വഴി നല്‍കുക. അങ്ങാടി പഞ്ചായത്തിന്റെ മുഴുവന്‍ ഭാഗങ്ങളിലും കുടിവെള്ളം എത്തിക്കുന്ന പൈപ്പ് സ്ഥാപിക്കാന്‍ 6.76 കോടി രൂപയുടെ ടെന്‍ഡര്‍ നടപടികള്‍ പൂര്‍ത്തിയായി. 2316 ഗാര്‍ഹിക കണക്ഷനുകളാണ് പദ്ധതി വഴി നല്‍കുക.
