തിരുവല്ല നെടുമ്പ്രത്ത് കാറിടിച്ച് വീട്ടമ്മ മരിച്ചു ; മരിച്ചത് തൊഴിലുറപ്പ് തൊഴിലാളിയായ നെടുമ്പ്രം സ്വദേശി

തിരുവല്ല :
തിരുവല്ല – അമ്പലപ്പുഴ സംസ്ഥാന പാതയിൽ നെടുമ്പ്രത്ത് നിയന്ത്രണം നഷ്ടപ്പെട്ട കാറിടിച്ച് വീട്ടമ്മ മരിച്ചു. നെടുമ്പ്രം മാലിപ്പറമ്പിൽ വീട്ടിൽ ചെല്ലമ്മ (66) യാണ് മരിച്ചത്. ഇന്ന് ഉച്ചകഴിഞ്ഞ് നെടുമ്പ്രം വാട്ടർ അതോറിറ്റി ഓഫീസിനു സമീപമായിരുന്നു അപകടം. അമിത വേഗതയിൽ നീരേറ്റുപുറം ഭാഗത്തുനിന്നും പൊടിയാടി ഭാഗത്തേക്ക് പോയ കാർ ചെല്ലമ്മയെ ഇടിച്ച് തെറിപ്പിക്കുകയായിരുന്നു. തൊഴിലുറപ്പ് ജോലിയ്ക്കിടെ ഉച്ച ഭക്ഷണം കഴിക്കാൻ വീട്ടിലേക്ക് പോയപ്പോൾ ആയിരുന്നു അപകടം നടന്നത്. അപകടത്തിൽ ഗുരുതര പരിക്കേറ്റ ചെല്ലമ്മയെ തിരുവല്ല താലൂക്ക് ആശുപത്രിയിലും തുടർന്ന്
ടി എം എം മെഡിക്കൽ മിഷൻ ആശുപത്രിയിലും എത്തിച്ചെങ്കിലും മരണം സംഭവിച്ചു. പുളിക്കീഴ് പോലീസ് മേൽ നടപടികൾ സ്വീകരിച്ചു.