തിരുവല്ല : പരുമലയിൽ ചായക്കടക്കാരന്റെ മർദ്ദനമേറ്റ് ചികിത്സയിലായിരുന്ന 60 വയസ്സുകാരൻ മരിച്ചു. വെണ്മണി പുന്തല റിയാസ് ഭവനിൽ മുഹമ്മദ് റാവുത്തർ ആണ് മരിച്ചത്. കഴിഞ്ഞ ഡിസംബർ 21ന് രാത്രി 9 മണിയ്ക്കായിരുന്നു മുഹമ്മദ് റാവുത്തർക്ക് മർദ്ദനമേറ്റത്. സംഭവത്തിൽ പുളിക്കീഴ് പോലീസ് വധശ്രമത്തിന് കേസെടുത്ത് അറസ്റ്റ് ചെയ്ത പരുമല കോട്ടക്കമാലി കോളനിയിൽ വാലു പറമ്പിൽ വീട്ടിൽ മാർട്ടിൻ (48 ) റിമാന്റിൽ കഴിയുകയാണ്. ഇയാൾക്കെതിരെ കൊലക്കുറ്റത്തിന് കേസെടുക്കും. പരുമല സെന്റ് ഗ്രിഗോറിയസ് ആശുപത്രിക്ക് മുമ്പിൽ ചായക്കട നടത്തുകയാണ് പ്രതിയായ മാർട്ടിൻ . ഇയാളുടെ കടയിൽ നിന്നും ചായ കുടിക്കാത്തതിനെ ചൊല്ലിയുണ്ടായ തർക്കത്തിനൊടുവിൽ മുഹമ്മദ് റാവുത്തരെ പ്രതി ക്രൂരമായി മർദ്ദിക്കുകയായിരുന്നു. തുടർന്ന് പരുമല ആശുപത്രിയിൽ ചികിത്സയിലായിരുന്ന മുഹമ്മദ് റാവുത്തർ ചൊവ്വാഴ്ച പുലർച്ചെയോടെയാണ് മരണപ്പെട്ടത്. പ്രതിക്കെതിരെ കൊലക്കുറ്റത്തിന് കേസ് എടുക്കുമെന്ന് ഡിവൈഎസ്പി എസ് അർഷാദ് പറഞ്ഞു.
പരുമലയിൽ ചായക്കടക്കാരന്റെ മർദ്ദനമേറ്റ് ചികിത്സയിലായിരുന്ന 60 കാരൻ മരിച്ചു ; പ്രതി റിമാൻഡിൽ
