കൊച്ചി : നടിയ്ക്കെതിരെ ബലാത്സംഗത്തിന് ക്വട്ടേഷൻ നൽകിയ കേസിലെ അന്വേഷണ ഉദ്യോഗസ്ഥരെ വധിക്കാൻ ശ്രമിച്ച സംഭവത്തിൽ നടൻ ദിലീപ് ചോദ്യം ചെയ്യലിന് ഹാജരായി. കളമശ്ശേരി ക്രൈംബ്രാഞ്ച് ഓഫീസിൽ ഹാജരായ ദിലീപിന്റെ ചോദ്യംചെയ്യൽ തുടങ്ങി. കൂട്ടുപ്രതികളായ ദിലീപിന്റെ അനിയൻ അനൂപ്,സഹോദരി ഭർത്താവ് ടി എൻ സൂരജ്,ഡ്രൈവർ അപ്പു,സുഹൃത്ത് ബൈജു എന്നുവരും ക്രൈംബ്രാഞ്ച് ഓഫീസിൽ ഹാജരായിട്ടുണ്ട്. യുവനടിയെ ആക്രമിച്ച് ദൃശ്യങ്ങള്‍ പകര്‍ത്തിയെന്ന കേസിന്‍റെ അന്വേഷണ ഉദ്യോഗസ്ഥരെ വകവരുത്താന്‍ ഗൂഢാലോചന നടത്തിയെന്ന കേസിലാണ് ചോദ്യം ചെയ്യൽ.
ദിലീപ് അടക്കം അഞ്ച് പ്രതികള്‍ ചോദ്യം ചെയ്യലിന് ഹാജരാകണമെന്നാവശ്യപ്പെട്ട് ക്രൈംബ്രാഞ്ച് നോട്ടീസ് നൽകിയിരുന്നു. സാക്ഷിയായി വിളിച്ചുവരുത്തി ശരത് ജി. നായരെയും ചോദ്യം ചെയ്യും. ചോദ്യം ചെയ്യല്‍ പൂർണമായും വീഡിയോയില്‍ ചിത്രീകരിക്കും. ഞായര്‍, തിങ്കള്‍, ചൊവ്വ ദിവസങ്ങളില്‍ രാവിലെ ഒമ്പതിന് പ്രതികൾ ഹാജരാകണം. രാത്രി എട്ടുവരെ ചോദ്യം ചെയ്തശേഷം വിട്ടയയ്ക്കും. ലഭിക്കുന്ന വിവരങ്ങളും മറ്റു തെളിവുകളും വ്യാഴാഴ്ച രാവിലെ മുദ്രവച്ച കവറില്‍ കോടതിയിൽ ഹാജരാക്കും.
