മുംബൈ: ഇന്ത്യൻ ക്രിക്കറ്റ് ടീം നായകൻ രോഹിത് ശർമയ്ക്കും ഭാര്യ റിതിക സാജ്ദേയ്ക്കും ആണ്‍കുഞ്ഞ് പിറന്നു. കഴിഞ്ഞ ദിവസമാണ് ഇരുവർക്കും രണ്ടാമതായി കുഞ്ഞ് പിറന്നത്. ഇരുവർക്കും ഒരു പെണ്‍കുഞ്ഞുണ്ട്. ആറ് വയസുകാരിയായ സമൈരയാണ് മകള്‍. രണ്ടാമത്തെ കുഞ്ഞിന്റെ ജനനമായി ബന്ധപ്പെട്ടുളള കൂടുതല്‍ വിവരങ്ങളറിയാൻ കാത്തിരിക്കുകയാണ് ആരാധകർ. രോഹിത് ശർമയും ഭാര്യയും കുഞ്ഞിനോടൊപ്പം നില്‍ക്കുന്ന ചിത്രങ്ങളും സോഷ്യല്‍മീഡിയയില്‍ വൈറലാണ്.
കുഞ്ഞിന്റെ ജനനവുമായി ബന്ധപ്പെട്ട തിരക്കുകള്‍ കാരണം രോഹിത്തിന് ഓസ്ട്രേലിയൻ പര്യടനത്തിനായി പുറപ്പെട്ട ഇന്ത്യൻ ടീമിനൊപ്പം പോകാൻ സാധിച്ചില്ല. വ്യക്തിപരമായ കാരണങ്ങളാല്‍ രോഹിത്തിന് ഒന്നാം ക്രിക്കറ്റ് ടെസ്റ്റില്‍ കളിക്കാൻ സാധിച്ചേക്കില്ലെന്ന് ഇന്ത്യൻ പരിശീലകൻ ഗൗതം ഗംഭീറും കഴിഞ്ഞ ദിവസം വെളിപ്പെടുത്തിയിരുന്നു. ഇതിനിടെയിലാണ് കുഞ്ഞിന്റെ ജനന വാർത്ത പുറത്തുവന്നത്.
