കോട്ടയം : ശബരിമല സീസണ്‍ അടുത്തതോടെ ദീര്‍ഘദൂര ട്രെയിനുകളില്‍ റിസര്‍വേഷന്‍ ലഭിക്കുന്നില്ല. ഇതരസംസ്ഥാന തൊഴിലാളികള്‍ കൃഷിപ്പണികള്‍ക്ക് നാട്ടിലേക്ക് കൂട്ടമായി മടങ്ങുന്ന സമയമാണ്. ആന്ധ്രപ്രദേശ്, പശ്ചിമ ബംഗാള്‍, തമിഴ്‌നാട്, ആസാം സെക്ടറിലേക്കുള്ള എല്ലാ ട്രെയിനുകളിലും ഡിസംബര്‍ അവസാനംവരെ റിസര്‍വേഷന്‍ വെയിറ്റിംഗ് ലിസ്റ്റിലാണ്. ശബരിമല തീര്‍ഥാടകര്‍ സംഘമായി റിസര്‍വേഷന്‍ ചെയ്യുന്നതിനാല്‍ മലയാളികളുടെ അവധി, അടിയന്തര യാത്രകളാണ് അവതാളത്തിലായത്. ക്രിസ്മസിന് നാട്ടിലേക്കുള്ള വരവും പോക്കും മുടങ്ങുന്ന സാഹചര്യമാണ്. ശബരിമല സീസണില്‍ കോട്ടയം, ചെങ്ങന്നൂര്‍ സ്റ്റേഷനുകളിലേക്കുള്ള ഇക്കൊല്ലത്തെ സ്‌പെഷല്‍ ട്രെയിനുകളുടെ ലിസ്റ്റ് റെയില്‍വേ പ്രസിദ്ധീകരിച്ചിട്ടില്ല. ആന്ധ്രയിലെ നന്ദ്യാലില്‍ നിന്ന് ഈ മാസം ആദ്യം മുതല്‍ സ്‌പെഷല്‍ ട്രെയിന്‍ ചെങ്ങന്നൂരിലേക്ക് പ്രഖ്യാപിച്ചെങ്കിലും ഓടിത്തുടങ്ങിയിട്ടില്ല. നവംബര്‍ 14 മുതല്‍ ശബരിമല തീര്‍ഥാടകര്‍ എത്തിത്തുടങ്ങും.
