ന്യൂസ് ഡെസ്ക് : ഹരിഹരന്‍ സംവിധാനം ചെയ്ത മയൂഖം സിനിമയിലൂടെ വെള്ളിത്തിരയിലേക്ക് എത്തിയ നടനാണ് സൈജു കുറുപ്പ്. കാരക്ടര്‍ , കോമഡി വേഷങ്ങളില്‍ മാത്രമല്ല, നായകനായും മിന്നി തിളങ്ങുന്ന സൈജു നിര്‍മ്മാണ മേഖലയിലേക്കും കടക്കുകയാണ്.സൈജു കുറുപ്പ് നായകനായി അഭിനയിക്കുന്ന നവാഗതനായ കൃഷ്ണദാസ് മുരളി രചനയും സംവിധാനവും നിര്‍വഹിക്കുന്ന ചിത്രം നിര്‍മ്മിക്കുന്നത് സൈജുവിന്റെ ഭാര്യ അനുപമ ബി. നമ്പ്യാര്‍. സൈജു കുറുപ്പ് എന്‍ര്‍ടെയ്ന്‍മെന്റ്‌സിന്റെ ബാനറില്‍ അനുപമ ബി. നമ്ബ്യാരും തോമസ് തിരുവല്ല ഫിലിംസിന്റെ ബാനറില്‍ തോമസ് തിരുവല്ലയും ചേര്‍ന്ന് നിര്‍മ്മിക്കുന്ന ചിത്രത്തിന്റെ പൂജ നാളെ രാവിലെ അങ്കമാലി ജോഷ് മാളില്‍ നടക്കും.
തുടര്‍ന്ന് ചിത്രീകരണം ആരംഭിക്കും.മാള, അന്നമനട എന്നിവിടങ്ങളാണ് ലൊക്കേഷന്‍. സൈജു കുറുപ്പ് എന്റര്‍ടെയ്ന്‍മെന്റ്‌സിന്റെ ബാനറില്‍ നിര്‍മ്മിക്കുന്ന ആദ്യ ചിത്രം കൂടിയാണ്. നാട്ടിന്‍പുറത്തിന്റെ പശ്ചാത്തലത്തിലാണ് കഥാപരിസരം.സായ് കുമാര്‍, അഭിരാം രാധാകൃഷ്ണന്‍ ,കലാരഞ്ജിനി, മണികണ്ഠന്‍ പട്ടാമ്ബി, സോഹന്‍ സീനുലാല്‍, നന്ദു പൊതുവാള്‍, ഗംഗ , ശ്രുതി സുരേഷ് എന്നിവരാണ് മറ്റ് താരങ്ങൾ. ജയറാം നായകനായ അബ്രഹാം ഓസ്‌ളലര്‍ ആണ് സൈജുവിന്റേതായി ഒടുവില്‍ റിലീസ് ചെയ്ത ചിത്രം.
