കോട്ടയം എസ്എച്ച് മൗണ്ടിന് സമീപം ട്രെയിൻ തട്ടി ഒരാൾ മരിച്ചു; മരിച്ചത് പൂഞ്ഞാർ സ്വദേശി

കോട്ടയം: എസ്എച്ച് മൗണ്ട് തെക്കുംപാലത്തിനു സമീപം ട്രെയിൻ തട്ടിമരിച്ച നിലയിൽ ഒരാളെ കണ്ടെത്തി. പൂഞ്ഞാർ സ്വദേശിയായ രഘുവാണ് മരിച്ചതെന്ന് കണ്ടെത്തി. രാത്രി പത്തുമണിയോടെയാണ് ട്രെയിൻ തട്ടി മരിച്ച നിലയിൽ റെയിൽവേ ട്രാക്കിൽ ഒരാളുടെ മൃതദേഹം കണ്ടെത്തിയത്. ട്രാക്കിൽ മൃതദേഹം കിടക്കുന്നത് കണ്ട് പിന്നാലെ എത്തിയ ട്രെയിൻ നിർത്തുകയായിരുന്നു. തുടർന്നാണ് നാട്ടുകാർ എത്തിയതും വിവരം ഗാന്ധിനഗർ പൊലീസിൽ അറിയിച്ചതും. തിരുവനന്തപുരത്തു നിന്നും ചെന്നൈയ്ക്കു പോകുകയായിരുന്ന ചെന്നൈ എക്‌സ്പ്രസാണ് ട്രാക്കിൽ മൃതദേഹം കിടക്കുന്നത് കണ്ട് നിർത്തിയത്. തുടർന്നു പൊലീസ് എത്തി നടപടികൾ പൂർത്തിയാക്കി മൃതദേഹം കോട്ടയം മെഡിക്കൽ കോളേജ് ആശുപത്രിയിലേയ്ക്കു മാറ്റി. ബന്ധുക്കളെ വിവരം അറിയിച്ചതായി പൊലീസ് അറിയിച്ചു. ഗാന്ധിനഗർ പൊലീസ് അസ്വാഭാവിക മരണത്തിന് കേസെടുത്തു.