ചിങ്ങവനം: പള്ളം പന്നിമറ്റം 28 ബി എസ്.എൻ.ഡി.പി. ശാഖായോഗം നേതൃത്വം കൊടുക്കുന്ന ശിവഗിരി തീർത്ഥാടന പദയാത്ര സമിതിയുടെ ആഭിമുഖ്യത്തിൽ പദയാത്ര 24 ന് ആരംഭിക്കും. നാഗമ്പടം ശ്രീ മഹാദേവ ക്ഷേത്ര സന്നിധിയിൽ നിന്നും ഉച്ച കഴിഞ്ഞ് 2 മണിക്ക് ആരംഭിക്കുന്ന പദയാത്ര വൈകിട്ട് 7.30 ന് പന്നിമറ്റം ശാഖാ യോഗത്തിൽ എത്തിച്ചേരും. ശാഖായോഗം പ്രസിഡന്റ് സുധീഷ് ബാബു അദ്ധ്യക്ഷത വഹിക്കുന്ന സമ്മേളനം തിരുവഞ്ചൂർ രാധാകൃഷ്ണൻ എം.എൽ.എ ഉത്ഘാടനം ചെയ്യും. ശിവഗിരി മഠം തന്ത്രി ശ്രീമദ് ശിവനാരായണ തീർത്ഥ സ്വാമികൾ അനുഗ്രഹ പ്രഭാഷണം നടത്തും. കോട്ടയം എസ്.എൻ.ഡി.പി. യൂണിയൻ സെക്രട്ടറി ആർ രാജീവ് പദയാത്ര ക്യാപ്റ്റൻ പി.ആർ. ബിജു തൃക്കോതമംഗലത്തിന് പീത പതാക കൈമാറും. ഗുരുദേവ വിഗ്രഹം സമർപ്പണം ചെയ്ത അനിമോൾ പനയിൽ താഴത്തിനെയും വിഗ്രഹ പ്രഭ സമർപ്പണം ചെയ്ത ശ്രീലേഖ മുരളി കൃഷ്ണനേയും 25 വർഷം പൂർത്തിയാക്കിയ പദയാത്രികരേയും പദയാത്രയ്ക്ക് അകമഴിഞ്ഞ സഹായങ്ങൾ നല്കുന്ന മഹത് വ്യക്തികളേയും ചടങ്ങിൽ ആദരിക്കും. കോട്ടയം നഗരസഭ കൗൺസിലർ ധന്യ ഗിരീഷ്, പദയാത്ര ചെയർമാൻ പി.എം.മനോജ്, കൺവീനർ ബിനു മോഹനൻ , സി.ജെ സതീഷ് , കെ.ആർ മോഹനൻ , പ്രസാദ് പി കേശവൻ, ടി.എൻ കൊച്ചുമോൻ , പി.ടി. മനോജ്, പി.കെ.കൃഷ്ണകുമാർ തുടങ്ങിയവർ സംസാരിക്കും. പദയാത്ര ചങ്ങനാശേരി, പൊടിയാടി, മാവേലിക്കര ഒച്ചിറ, കൊല്ലം , പാരിപ്പള്ളി വഴി 30 ന് വൈകിട്ട് ശിവഗിരിയിൽ എത്തി ചേർന്ന് പിറ്റേന്ന് നടക്കുന്ന ചരിത്ര പ്രസിദ്ധമായ തീർത്ഥാടന ഘോഷയാത്രയിൽ പങ്കെടുക്കും.
