സംസ്ഥാനത്തിന്റെ വിവിധ ഭാഗങ്ങളിലായി നൂറിലേറെ മോഷണക്കേസുകൾ; വീട് കുത്തിത്തുറന്ന് മോഷണം നടത്തുന്നതിൽ സ്‌പെഷ്യലിസ്റ്റ്; കുപ്രസിദ്ധ മോഷ്ടാവായ മലപ്പുറം സ്വദേശി രാമപുരത്ത് പിടിയിൽ

പാലാ: വീട് കുത്തിത്തുറന്ന് മോഷണം നടത്തുന്നതിൽ സ്‌പെഷ്യലിസ്റ്റായ കുപ്രസിദ്ധ മോഷ്ടാവ് പിടിയിൽ. വിവിധ ജില്ലകളിലായി നൂറോളം കേസുകളിൽ പ്രതിയായ മലപ്പുറം ചോക്കാട് കുന്നുമ്മേൽ വീട്ടിൽ ചെല്ലപ്പൻ മകൻ പനച്ചിപ്പാറ സുരേഷ് എന്ന് വിളിക്കുന്ന സുരേഷ് (62) നെയാണ് രാമപുരം പോലീസ് അറസ്റ്റ് ചെയ്തത്. കഴിഞ്ഞദിവസം പാറത്തോടുള്ള ഫ്രാൻസിസ് ചെറുകര എന്നയാളുടെ വീട് ആണ് ഇയാൾ കുത്തിത്തുറന്ന് മോഷണം നടത്തിയത്. മോഷണത്തിനു ശേഷം ഇയാൾ ഒളിവിൽ പോവുകയായിരുന്നു.

തുടർന്ന് ജില്ലാ പൊലീസ് മേധാവിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിക്കുകയും ഇയാൾക്ക് വേണ്ടിയുള്ള തിരച്ചിൽ ശക്തമാക്കുകയും ചെയ്തിരുന്നു. കൂത്താട്ടുകുളത്ത് സമാനമായ കേസിൽ പ്രതിയായി ശിക്ഷ അനുഭവിച്ച് പുറത്തിറങ്ങിയതിനു ശേഷമാണ് കഴിഞ്ഞദിവസം രാത്രി ഇയാൾ വീട് കുത്തിത്തുർന്ന് മോഷണം നടത്തിയത്. ഇയാൾക്ക് മലപ്പുറം, എറണാകുളം, കൂത്താട്ടുകുളം, മൂവാറ്റുപുഴ, ഈരാറ്റുപേട്ട, മണർകാട്, പള്ളിക്കത്തോട്, തിടനാട്, പാലാ എന്നീ സ്റ്റേഷനുകളിലായി നൂറോളം കേസുകളാണ് നിലവിലുള്ളത്.

ജില്ലാ പൊലീസ് മേധാവി കെ. കാർത്തിക്കിന്റെ നേതൃത്വത്തിലുള്ള അന്വേഷണസംഘം ഇയാളെ മലപ്പുറത്ത് നിന്നുമാണ് പിടികൂടിയത്. പാലാ ഡിവൈഎസ്പി ഗിരീഷ് പി സാരഥി, രാമപുരം സ്റ്റേഷൻ ഹൗസ് ഓഫിസർ ഇൻസ്‌പെക്ടർ കെ. എൻ രാജേഷ്, എസ്. ഐ. മാരായ അരുൺകുമാർ പി. എസ്, സാബു എം.ജി, സിവിൽ പൊലീസ് ഓഫിസർമാരായ കൃഷ്ണകുമാർ, റോബി തോമസ്, ശരത് കുമാർ പി.എസ്, നിതാന്ത് കൃഷ്ണൻ, എന്നിവരും അന്വേഷണ സംഘത്തിൽ ഉണ്ടായിരുന്നു.പ്രതിയെ കോടതിയിൽ ഹാജരാക്കി റിമാൻഡ് ചെയ്തു.