പാമ്പാടിയിൽ പേ വിഷബാധ സംശയിക്കുന്ന നായയുടെ ആക്രമണം;കുട്ടി അടക്കം രണ്ടുപേർക്ക്‌ കടിയേറ്റു

കോട്ടയം :പാമ്പാടിയിൽ പേ വിഷബാധ സംശയിക്കുന്ന നായയുടെ ആക്രമണം.എട്ടു വയസ്സുള്ള കുട്ടിയടക്കം രണ്ടുപേർക്ക് കടിയേറ്റു.

ഒമ്പതാം മൈൽ പറയത്തോട്ടം ഭാഗത്താണ് ചൊവ്വാഴ്ച രാത്രിയോടെ പേവിഷബാധ സംശയിക്കുന്ന തെരുവു നായയുടെ ആക്രമണം നടന്നത്.

പറയതോട്ടം ഭാഗത്ത് വാടകയ്ക്ക് താമസിക്കുന്ന എട്ടു വയസുകാരിയായ കുട്ടി, മുറ്റത്ത് കളിച്ചു കൊണ്ട് നിൽക്കവേയാണ് നായ ആക്രമിച്ചത്. ശരീരത്തിൻ്റെ പല ഭാഗത്ത് നായ കടിച്ചിട്ടുണ്ട്. കുട്ടിയെ മെഡിക്കൽ കോളേജ് കുട്ടികളുടെ ആശുപത്രിയിൽ പ്രവേശിപ്പിച്ചു.

ഇതിന് പിന്നാലെയാണ് ഒമ്പതാം ഭാഗത്ത് വച്ച് രാജു എന്ന പ്രദേശവാസിയെയും നായ ആക്രമിച്ചത്. ശരീരത്തിൽ വലിയ മുറിവുകൾ ഏറ്റ ഇദ്ദേഹവും കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലാണ്.

പ്രദേശത്തെ നിരവധി തെരുവ് നായ്ക്കളെയും, വളർത്തു മൃഗങ്ങളെയും ഈ നായ കടിച്ചിട്ടുണ്ട്.

പിന്നീട് ഇന്ന് രാവിലെയോടെ ഈ നായയെ ചത്ത നിലയിൽ കണ്ടെത്തി.

മൃഗസംരക്ഷണ വകുപ്പ് സ്ഥലത്തെത്തി നായയുടെ ജഡം പരിശോധനയ്ക്കായി കൊണ്ടുപോയി.