തലയോലപ്പറമ്പ്: വ്യാപാരിയെ കാണാതായതായി പരാതി. തലയോലപറമ്പ് മിഠായിക്കുന്ന് വള്ളോപറമ്പിൽ മഹേഷി(32)നെയാണ് കാണാതായത്. ഇതു സംബന്ധിച്ചു പോലിസിൽ പരാതി നൽകിയിട്ടും അന്വേഷണം കാര്യക്ഷമമല്ലെന്ന് ബന്ധുക്കളും നാട്ടുകാരും ആരോപിച്ചു.വ്യാഴാഴ്ച രാത്രി 11ഓടെയാണ് മഹേഷിനെ കാണാതായത്. ഒരാളെ കാണാനുണ്ടെന്നും താമസിച്ചേവരുവെന്ന് മഹേഷ് അറിയിച്ചിരുന്നു. വ്യാഴാഴ്ച രാത്രി12ഓടെ മഹേഷിന്റെ മൊബൈൽ ഫോൺ, കടയുടെ താക്കോൽ, കണക്ക് ബുക്ക് എന്നിവ വീടിന്റെ തിണ്ണയിൽ നിന്നും കണ്ടെത്തിയിരുന്നു.
പിറ്റേന്ന് രാവിലെവരെ മഹേഷിനെ വീട്ടുകാർ കാത്തിരുന്നെങ്കിലും തിരികെ എത്തിയില്ല. തുടർന്ന് വീട്ടുകാർ തലയോലപറമ്പ് പോലീസിൽ പരാതി നൽകുകയായിരുന്നു. പിന്നീട് ബന്ധുക്കൾ പഞ്ചായത്തംഗം നിസാർ വരവുകാലയെയും മറ്റ് രാഷ്ട്രീയ പ്രതിനിധികളെയും വിവരം അറിയിച്ചു. തുടർന്ന് നടത്തിയ അന്വേഷണത്തിലാണ് ശനിയാഴ്ച എറണാകുളം സൗത്ത് റെയിൽവേ സ്റ്റേഷനിൽ നിന്നും മഹേഷിന്റെ ഓട്ടോറിക്ഷ കണ്ടെത്തുന്നത്. ഈ വിവരം പോലീസിനെ അറിയിച്ചു. മഹേഷുമായി അടുത്തിടപഴകിയിരുന്ന വരെക്കുറിച്ചും ഫോണിൽ നിരന്തരം ബന്ധപ്പെട്ടിരുന്നവർ, സി സി ടി ടി ദൃശ്യങ്ങൾ തുടങ്ങിയവ പരിശോധിച്ച് പഴുതടച്ചുള്ള അന്വേഷണമാണ് നടന്നു വരുന്നതെന്ന് തലയോലപറമ്പ് പോലീസ് അറിയിച്ചു
