അത് ഭക്ഷ്യ വിഷബാധയല്ല , കൊലപാതകം ! അവണൂരിൽ ശശീന്ദ്രനെ കൊന്നത് മകൻ ; കൊലപാതകം കടലക്കറിയിൽ വിഷം കലർത്തി

തൃശൂർ : അവണൂരിലെ ശശീന്ദ്രന്റെ മരണം കൊലപാതകം തന്നെ, പ്രതിസ്ഥാനത്ത് മകനും. ആയുർവേദ ഡോക്ടറായ മകൻ മയൂർനാഥനെ (25) പൊലീസ് അറസ്റ്റ് ചെയ്തു. ഞായറാഴ്ച്ചയാണ് സംഭവം. വീട്ടിലുണ്ടാക്കിയ ഇഡ്ഡലിയും സാമ്പാറും കടലക്കറിയും കഴിച്ചതിനു പിന്നാലെ പുറത്തേക്ക് പോയിരുന്നു.

അധികം താമസിക്കാതെ എടിഎമ്മിൽ നിന്നും പണം എടുക്കാൻ നിൽക്കവേ കുഴഞ്ഞു വീഴുകയായിരുന്നു. തൃശൂർ മെഡിക്കൽ കോളേജിൽ എത്തിച്ചെങ്കിലും രക്തം ഛർദ്ദിക്കുകയും തുടർന്ന് മരണപ്പെടുകയുമായിരുന്നു. പിന്നാലെ ശശീന്ദ്രനൊപ്പം ഭക്ഷണംകഴിച്ച അമ്മ കമലാക്ഷി (92), ഭാര്യ ഗീത (45), ഇവരുടെ പറമ്പിൽ തെങ്ങുകയറാനെത്തിയ തൊഴിലാളികളായ തണ്ടിലംപറമ്പിൽ ശ്രീരാമചന്ദ്രൻ (55), മുണ്ടൂർ ആണ്ടപ്പറമ്പ് വേടരിയാട്ടിൽ ചന്ദ്രൻ (60) എന്നിവരും രക്തം ഛർദിച്ചു ഗുരുതരാവസ്ഥയിൽ ആശുപത്രിയിലാണ്.

അച്ഛനോടും രണ്ടാനമ്മയോടും തോന്നിയ പകയാണ് വിഷം കലർത്തിയതിനു പിന്നിലെന്ന് വ്യക്തമായിട്ടുണ്ട്. ഓൺലൈനിൽ രാസവസ്തുക്കൾ വാങ്ങി വിഷം സ്വയം തയാറാക്കുകയായിരുന്നുവെന്നാണ് മയൂര്‍നാഥന്റെ മൊഴി.

അടുത്തിടെ കുടൽ ശസ്ത്രക്രിയയ്ക്കു വിധേയനായ മയൂർനാഥ് പ്രത്യേകം തയാറാക്കിയ ദ്രവരൂപത്തിലുള്ള ഭക്ഷണമാണു കഴിക്കുന്നതെന്നാണ് ബന്ധുക്കൾ ഉൾപ്പെടെയുള്ളവർ പൊലീസിനോടു പറഞ്ഞത്.

മറ്റുള്ളവർ കഴിച്ച പ്രഭാതഭക്ഷണം മയൂർനാഥ് കഴിക്കാതിരുന്നത് അതുകൊണ്ടാണെന്ന വിശദീകരണത്തിൽ പൊലീസിന് സംശയം തോന്നിയിരുന്നു. തുടർന്ന് നടത്തിയ അന്വേഷണത്തിലാണ് കടലക്കറിയിൽ വിഷം കലർത്തിയാണ് കൊലപ്പെടുത്തിയതെന്ന് മയൂര്‍നാഥൻ സമ്മതിച്ചത്.