കോട്ടയം : തിരുവാർപ്പിൽ പ്രളയ ദുരന്ത സാദ്ധ്യതകൾ മുന്നിൽക്കണ്ട് ,ദുരന്തനിവാരണ പ്രവർത്തനങ്ങൾ ഏകോപിപ്പിക്കുന്നതിന് വിവിധ വകുപ്പ് ഉദ്യോഗസ്ഥരുടെ യോഗം ചേർന്നു .ഗ്രാമ പഞ്ചായത്ത് പ്രസിഡണ്ട് അജയൻ കെ മേനോൻ്റെ അദ്ധ്യക്ഷത വഹിച്ചു. യോഗത്തിൽ ഗ്രാമ പഞ്ചായത്തംഗങ്ങൾ , തദ്ദേശഭരണം ,റവന്യൂ ,പോലീസ് ,ആരോഗ്യം ,സാമുഹ്യ നീതി ,ഫയർഫോഴ്സ് ,മേജർ ഇറിഗേഷൻ ,മൈനർ ഇറിഗേഷൻ, കെ എസ് ഇ ബി ,വാട്ടർ അതോറിറ്റി ഉദ്യോഗസ്ഥർ, ആർ ആർ ടി അംഗങ്ങൾ തുടങ്ങിയവർ പങ്കെടുത്തു. പ്രളയ സാദ്ധ്യതയുള്ള മേഖലകളിൽ ക്യാമ്പുകൾക്കായി കൂടുതൽ കെട്ടിടങ്ങൾ കണ്ടെത്തുന്നതിനും ആ കെട്ടിടങ്ങളിൽ സംയുക്ത പരിശോധന നടത്തി ആവശ്യമായ ക്രമീകരണങ്ങൾ ഏർപ്പെടുത്തുന്നതിനും തീരുമാനിച്ചു .ആരോഗ്യ പ്രവർത്തകരുടെ സേവനം ക്യാമ്പുകളിൽ ഉറപ്പാക്കുന്നതിനും പ്രഥമ ശുശ്രൂഷാ കിറ്റ് തയ്യാറാക്കുന്നതിനും തീരുമാനിച്ചു .വൈദ്യുതി ,കുടിവെള്ളം തുടങ്ങിയവ തടസമില്ലാതെ ലഭിക്കുന്നതിന് ക്രമീകരണം ഏർപ്പെടുത്തും . മീനച്ചിലാറ്റിലെ പാലങ്ങളുടെ തൂണുകളിൽ അടിഞ്ഞ മാലിന്യങ്ങൾ നീക്കം ചെയ്ത് നീരൊഴുക്ക് സുഗമമാക്കുന്നതിന് മേജർ ഇറിഗേഷൻ വകുപ്പ് നടപടി സ്വീകരിക്കും .ക്യാമ്പുകളിൽ പോലീസ് സഹായം ഉറപ്പാക്കും . പഞ്ചായത്താഫീസ് കൺട്രോൾ റൂമായി പ്രവർത്തിക്കും .സന്നദ്ധ പ്രവർത്തകർ ,ബോട്ട്, വള്ളം ,ജെ സി ബി ,ടിപ്പർ ഉടമകൾ ,എന്നിവരുടെ പട്ടിക തയ്യാറാക്കി അടിയന്തിര ഘട്ടങ്ങളിൽ അവരുടെ സേവനം ലഭ്യമാക്കാനുള്ള നടപടികൾ സ്വീകരിക്കുന്നതിനും തീരുമാനിച്ചു.
