കോട്ടയം: കോട്ടയം നിയോജക മണ്ഡലത്തിലെ ഗ്രാമങ്ങളുടെ ഹൃദയം കീഴടക്കി എൽഡിഎഫ് സ്ഥാനാർത്ഥി തോമസ് ചാഴികാടൻ. കൊന്നപൂക്കളും പഴങ്ങളും ഇളനീർ കുലകളുമായി സ്ത്രീകളും കുട്ടികളും അടക്കം നൂറുകണക്കിന് ആളുകളാണ് ഓരോ സ്വീകരണ കേന്ദ്രത്തിലും സ്ഥാനാർത്ഥിയെ കാണാനെത്തിയത്. കോടയം നിയോജക മണ്ഡലത്തിലെ വിജയപുരം, പനച്ചിക്കാട് പഞ്ചായത്തുകളിലായിരുന്നു ഇന്ന് സ്ഥാനാർത്ഥിയുടെ പര്യടനം. രാവിലെ 8ന് വിജയപുരം പഞ്ചായത്തിലെ മാലിയിൽ സി പി എം ജില്ലാ സെക്രട്ടറി എ വി റസൽ പര്യടനം ഉദ്ഘാടനം ചെയ്തു. തുടർന്ന് പഞ്ചായത്തിന്റെ വിവിധ വാർഡുകളിലെ സ്വീകരണ കേന്ദ്രങ്ങളിൽ ആവേശകരമായ സ്വീകരണം.
ഓരോ കേന്ദ്രത്തിലും ചെറിയ വാക്കുകളിൽ സ്ഥാനാർത്ഥിയുടെ വോട്ടഭ്യർത്ഥന. അതിന് ധൈര്യമായി മുമ്പോട്ടു പൊയ്ക്കോ വിജയം ഉറപ്പെന്ന് പ്രവർത്തകരുടെ മറുപടി. കടന്നു പോയ വഴികളിലൊക്കെയും എംപിയുടെ ഇടപെടലിലൂടെ നടന്ന വികസനങ്ങൾ തന്നെ വോട്ടാകുമെന്നും നാട്ടുകാർ സ്ഥാനാർത്ഥിക്ക് ഉറപ്പു നൽകി. എൽഡിഎഫ് നേതാക്കളായ എം കെ പ്രഭാകരൻ, ടി സി ബിനോയ്, ജോജി കുറത്തിയാടൻ എന്നിവർ പര്യടന പരിപാടിക്ക് നേതൃത്വം നൽകി.
