ഷെഡ്യൂൾ പാക്കപ്പ് പറഞ്ഞ് ടൊവിനോയുടെ ‘അന്വേഷിപ്പിൻ കണ്ടെത്തും’…വീഡിയോ വൈറൽ

ടൊവിനോയെ നായകനാക്കി ഡാര്‍വിന്‍ കുര്യാക്കോസ് സംവിധാനം ചെയ്യുന്ന ‘അന്വേഷിപ്പിൻ കണ്ടെത്തും’ എന്ന ചിത്രത്തിന്റെ ഷെഡ്യൂൾ പാക്കപ്പ് ആയിരിക്കുകയാണ്. ഇതുമായി ബന്ധപെട്ട വീഡിയോ ടൊവിനോ പങ്കു വെച്ചു.

സിനിമയുടെ ഷൂട്ടിംഗ് ലൊക്കേഷനിൽ നിന്നുള്ള അണിയറപ്രവർത്തകരുടേയും മറ്റും ചിത്രങ്ങളും വീഡിയോയും ഉൾക്കൊള്ളിച്ച് ഒരുക്കിയിരിക്കുന്ന ഷെഡ്യൂൾ പാക്കപ്പ് വീഡിയോയിൽ ചിത്രത്തിലെ കേന്ദ്ര കഥാപാത്രം എസ്.ഐ ആനന്ദ് നാരായണന്‍റെ ലുക്കിലാണ് ടൊവിനോയുള്ളത്.

തീയറ്റര്‍ ഓഫ് ഡ്രീംസിന്‍റെ ബാനറില്‍ ഡോൾവിൻ കുര്യാക്കോസ്, ജിനു വി. എബ്രാഹാം എന്നിവരാണ് ചിത്രം നിർമ്മിക്കുന്നത്. സിനിമയുടെ ആദ്യഘട്ട ചിത്രീകരണം മാര്‍ച്ച് അഞ്ചിന് കോട്ടത്ത് ആരംഭിച്ചിരുന്നു.

ഇൻവസ്റ്റിഗേറ്റീവ് ത്രില്ലർ  ജോണറിലാണ് ചിത്രം നിർമ്മിച്ചിരിക്കുന്നത്. പതിവു രീതിയിലുള്ള  അന്വേഷണങ്ങളുടെ കഥയല്ല, മറിച്ച് അന്വേഷകരുടെ കഥയാണ്  ഈ ചിത്രം പറയുന്നതെന്നാണ് അണിയറപ്രവർത്തകർ പറയുന്നത്.

ടൊവിനോയ്ക്ക് പുറമെ സിദ്ദിഖ്, ഇന്ദ്രൻസ്, ഷമ്മി തിലകൻ ബാബുരാജ്, പ്രമോദ് വെളിയനാട്, വിനീത് തട്ടിൽ, രമ്യാ സുവി (നൻ പകൽ മയക്കം ഫെയിം) എന്നിവർ പ്രധാന താരങ്ങളായെത്തുന്നു. ചിത്രത്തിൽ രണ്ടു നായികമാരാണുള്ളത്. നായികമാർ പുതുമുഖങ്ങളാണ്.

തമിഴ്, തെലുങ്ക്, ചലച്ചിത്ര വേദിയിലെ മികച്ച സംഗീത സംവിധായകനായ സന്തോഷ് നാരായണനാണ് ഈ ചിത്രത്തിന്‍റെ സംഗീത സംവിധായകൻ.  പശ്ചാത്തല സംഗീതവും അദ്ദേഹം തന്നെ നിർവഹിക്കുന്നു.

സിനിമയുടെ ചിത്രീകരണം രണ്ടു ഘട്ടങ്ങളിലായിട്ടാണ് പൂർത്തിയാകുന്നത്. കോട്ടയം, തൊടുപുഴ, കട്ടപ്പന, എന്നിവിടങ്ങളിലായിട്ടാണ് ആദ്യഘട്ട ചിത്രീകരണം പൂർത്തിയായിരിക്കുന്നത്.  ചായാഗ്രഹണം ഗൗതം ശങ്കർ (തങ്കം ഫെയിം ), എഡിറ്റിംഗ് സൈജു ശ്രീ ധർ, കലാ സംവിധാനം ദിലീപ് നാഥ്. മേക്കപ്പ്. സജീകാട്ടാക്കട, കോസ്റ്റ്യും ഡിസൈൻ സമീറ സനീഷ്, പ്രൊഡക്ഷൻ കൺട്രോളർ  ജംഷീ‍ർ പുറക്കാട്ടിരി, പി ആർ ഓ ശബരി, മാർക്കറ്റിങ് സ്നേക്ക്പ്ലാന്‍റ്.