തിരുവനന്തപുരം അമ്പലമുക്കിലെ അതിക്രൂരമായ കൊലപാതകം; യുവതിയെ കൊലപ്പെടുത്തിയത് തന്നെയെന്നു പൊലീസ്; നിർണ്ണായക തെളിവ് കണ്ടെത്തി; സിസിടിവി ദൃശ്യങ്ങൾ കേന്ദ്രീകരിച്ച പൊലീസ് പരിശോധന

തിരുവനന്തപുരം: അമ്പലമുക്കിൽ ചെടിക്കടയിൽ ജോലി ചെയ്തിരുന്ന യുവതി കൊല്ലപ്പെട്ട സംഭവത്തിൽ നിർണായകമായ സിസിടിവി ദൃശ്യങ്ങൾ കണ്ടെത്തി. കൊലപാതകം നടന്ന അമ്പലനഗറിലെ സ്ഥാപനത്തിൽ നിന്ന് ഇന്നലെ 11.30 ന് ശേഷം അമ്പലമുക്കിലേക്ക് നടന്നുപോയ മൂന്നുപേരെ കേന്ദ്രീകരിച്ചാണ് അന്വേഷണം. ഇതിലൊരാൾ കൊലപാതകി എന്നാണ് പൊലീസ് സംശയിക്കുന്നത്

അമ്പലനഗറിന് ഇരുഭാഗത്തുമുള്ള മുഴുവൻ സിസിടിവികളും പൊലീസ് പരിശോധിച്ചു. അമ്പലമുക്കിലേക്കുള്ള സിസിടിവിയിൽ നിന്നാണ് നിർണായക വിവരങ്ങൾ പൊലീസിന് ലഭിച്ചത്. പാന്റ്സ് ധരിച്ച രണ്ട് പേരും മുണ്ടുടുത്ത ഒരാളുമാണ് കൃത്യം നടന്നുവെന്ന് കരുതുന്ന സമയത്തിന് ശേഷം ഇത് വഴി പോയത്. ഇവരിൽ ഒരാളിനെക്കുറിച്ച് പൊലീസിന് വ്യക്തമായ സൂചന ലഭിച്ചുവെന്നാണ് വിവരം.

കുറവൻകോണം ഭാഗത്തേക്ക് ആരും പോയതായി ദൃശ്യങ്ങളില്ല. ഇന്നലെ ഞായറാഴ്ച്ച നിയന്ത്രണമായതിനാൽ വാഹനങ്ങളും റോഡിൽ അധികമുണ്ടായിരുന്നില്ല. വിനിതയുടെ ഫോണിലേക്ക് വന്ന കോളുകളും പൊലീസ് പരിശോധിക്കുന്നുണ്ട്. സംശയം തോന്നുള്ള കോളുകളൊന്നും ഈ ഫോണിലില്ലെന്നാണ് സൂചന. ചെടി നനയ്ക്കാൻ രാവിലെ വിനീത കെട്ടിടത്തിൻറെ മട്ടുപ്പാവിൽ കയറുന്നത് ചില പരിസരവാസികൾ കണ്ടിരുന്നു.

അതിനുശേഷം സ്ഥാപനത്തിൽ ആരോ എത്തി വിനീതയുമായി തർക്കം ഉണ്ടാകുകയും പിടിവലി നടത്തിയ ശേഷം കൊലപാതകം നടത്തിയെന്നുമാണ് പൊലീസ് പറയുന്നത്. വിനീതയുടെ ആഭരണം കൈക്കലാക്കാനായിരുന്നു കൊലപാതകമെന്നാണ് പൊലീസ് സംശയം. സംഭവസ്ഥലത്ത് തിങ്കളാഴ്ചയും പൊലീസ് പരിശോധന നടത്തി.