ചെങ്ങന്നൂര്‍: പറമ്പില്‍ കെട്ടിയിട്ട രണ്ടു പോത്തുകളെ മോഷ്ടിച്ച കേസില്‍ ഒരാള്‍ അറസ്റ്റില്‍. രണ്ടു പ്രതികള്‍ ഒളിവില്‍. ചെറിയനാട് ചെറുവല്ലൂര്‍ ആലക്കോട് ഭാഗത്ത് കോടംപറമ്പില്‍ ദിനേശ് (39) ആണ് വെൺമണി പോലീസിന്‍റെ പിടിയിലായത്. കേസിലെ രണ്ടാം പ്രതിയാണ് ദിനേശ് .
ജൂലൈ ആറിന് രാത്രിയിലാണ് കൊല്ലകടവ് സബ് രജിസ്ട്രാര്‍ ഓഫീസിനു സമീപം പറമ്പില്‍ കെട്ടിയിരുന്ന പോത്തുകളെ കടത്തിയത്. 84,000 രൂപ വിലയുള്ള ഇവയെ 48,000 രൂപയ്ക്ക് കായംകുളത്തുള്ള ഇറച്ചിക്കച്ചവടക്കാര്‍ക്കു വിറ്റു. തുടര്‍ന്ന് മൂന്നു പ്രതികളും പണം വീതിച്ചെടുത്തു. ഇതില്‍ 15,000 രൂപ അറസ്റ്റിലായ ദിനേശില്‍നിന്ന് കണ്ടെടുത്തു.
പോത്തുകളെ കടത്തിക്കൊണ്ടു പോയ വാഹനം കണ്ടെത്താനും ഒളിവിലുള്ള ഒന്നും മൂന്നും പ്രതികളെ കണ്ടെത്താനും അന്വേഷണം ശക്തമാക്കി. ഇതിന് മുൻപും വിവിധ സ്ഥലങ്ങളില്‍നിന്നു പോത്തുകളെ കാണാതായ സംഭവങ്ങള്‍ക്ക് ഇതോടുകൂടി തുമ്പുണ്ടായിരിക്കുകയാണെന്ന് പോലീസ് പറഞ്ഞു. വെൺമണി എസ്എച്ച്ഒ എ നസീറിന്‍റെ നേതൃത്വത്തിൽ എസ്ഐ ബി ജെ ആന്‍റണി, സീനിയര്‍ സിപിഒ ഹരികുമാര്‍, സിപിഒ അഖില്‍ രാജ് എന്നിവരടങ്ങുന്ന സംഘമാണ് പ്രതിയെ അറസ്റ്റു ചെയ്തത്.