വയനാട് ഉരുൾപൊട്ടൽ; മരണസംഖ്യ 19 ആയി; ട്രീവാലി റിസോർട്ടിൽ കുടുങ്ങിക്കിടക്കുന്നത് നാട്ടുകാരായ നൂറിലധികം പേർ

വയനാട്: മേപ്പാടി മുണ്ടക്കൈ ടൗണിലും ചൂരൽമലയിലും വൻ ഉരുൾപൊട്ടൽ. പുലർച്ചെ ഒരു മണിയോടെ കനത്ത മഴയ്ക്കിടെയാണ് ഒരുൾപൊട്ടിയത്. രക്ഷാപ്രവർത്തനം നടക്കുന്നതിനിടെ നാലു മണിയോടെ വീണ്ടും ഉരുൾപൊട്ടി. ഇത് വരെ 19 മരണം സ്ഥിരീകരിച്ചു. മരണസംഖ്യ ഇനിയും ഉയരാനാണ് സാധ്യത. ഒലിച്ച് വന്ന പത്തോളം മൃതദേഹങ്ങൾ നിലമ്പൂർ ചാലിയാർ പുഴയിൽ നിന്നും കണ്ടെത്തി.

വയനാട്ടിൽ ശക്തമായ മഴ തുടരുന്നതിനാൽ രക്ഷാപ്രവർത്തനവും ദുഷ്കരമാവുകയാണ്. രക്ഷാ പ്രവർത്തനം ഏകോപിപ്പിക്കാൻ 5 മന്ത്രിമാർ വയനാട്ടിൽ എത്തും.

വയനാട്ടിലെ ട്രീവാലി റിസോർട്ടിൽ നാട്ടുകാരായ നൂറിലധികം പേർ കുടുങ്ങിക്കിടക്കുന്നുണ്ട്. ചൂരൽമലയിലെ ഹോംസ്റ്റേയിൽ നിന്നും കാണാതായ രണ്ട് ഡോക്ടര്‍മാരിൽ ഒരാളെ കണ്ടെത്തി.  പരിക്കുകളോടെ ഒരാളെ ആശുപത്രിയിൽ പ്രവേശിപ്പിച്ചു. ഒഡീഷാ സ്വദേശികളായ ഡോക്ടർമാരാണ് അപകടത്തിൽ പെട്ടതെന്നാണ് വിവരം.