കോട്ടയം : ഉരുൾ പൊട്ടലിൽ വൻ ദുരന്തം സംഭവിച്ച വയനാട് ജനതയ്ക്കായി കേരള സ്റ്റുഡന്റ്‌സ് കോണ്‍ഗ്രസ് (കെ.എസ്.സി) കൈ കോർക്കുന്നു. വയനാട്ടിലെ ദുരന്ത മേഖലയിലെ ജനങ്ങൾ നേരിടുന്ന പ്രശ്നങ്ങൾക്ക് പരിഹാരം കാണാൻ കെ.എസ്.സി സംസ്ഥാന പ്രസിഡന്റ് ജോണ്‍സ് കുന്നപ്പിള്ളിയുടെ നേതൃത്വത്തില്‍ 20 അംഗങ്ങള്‍ അടങ്ങുന്ന കോമണ്‍ സര്‍വീസ് സെല്‍ പ്രവർത്തനം ആരംഭിച്ചു.
കേന്ദ്ര – സംസ്ഥാന സര്‍ക്കാരുകൾ വാഗ്ദാനം ചെയ്തിരിക്കുന്ന ആനുകൂല്യങ്ങള്‍ അര്‍ഹതപ്പെട്ടവർക്ക് ലഭിക്കുന്നുണ്ടെന്ന് ഉറപ്പാക്കുകയും, വിദ്യാര്‍ത്ഥികള്‍ക്കുള്ള പഠനോപകരണങ്ങള്‍ വിതരണം ചെയ്യാനുമാണ് കോമണ്‍ സര്‍വീസ് സെല്ലിന്റെ പ്രവർത്തന ഉദ്ദേശം.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
2018-ലെ കേരളത്തിലെ പ്രളയക്കെടുതിക്ക് ശേഷം, വീടും ഭൂമിയും നഷ്ടപ്പെട്ടവര്‍ക്ക് പത്ത് ലക്ഷം രൂപയും മരണപ്പെട്ടവരുടെ കുടുംബങ്ങള്‍ക്ക് നാല് ലക്ഷം രൂപയും സംസ്ഥാന സർക്കാർ നഷ്ടപരിഹാരം വാഗ്ദാനം ചെയ്തിരുന്നു. ദുരിതാശ്വാസ ക്യാമ്പുകളില്‍ കഴിയുന്ന ഒരു കുടുംബത്തിന് 3800 രൂപ വീതം നല്‍കാനും തീരുമാനിച്ചിരുന്നു. പല കുടുംബങ്ങള്‍ക്കും വാഗ്ദാനം ചെയ്ത സഹായം ലഭിക്കാത്ത സാഹചര്യത്തിലാണ് കെ.എസ്.സി സംസ്ഥാന കമ്മിറ്റിയുടെ നേതൃത്വത്തിൽ കോമണ്‍ സര്‍വീസ് സെല്‍, ദുരിതബാധിതർക്ക് ആവശ്യമായ പിന്തുണ നല്‍കുന്നതിന് മുന്നിട്ടിറങ്ങിയിരിക്കുന്നത്.
വയനാട്ടിലും സമീപ ദുരിത ബാധിത പ്രദേശമായ കോഴിക്കോട് വിലങ്ങാടും കേന്ദ്രീകരിച്ചാണ് സെല്ലിന്റെ പ്രവര്‍ത്തനം ആരംഭിച്ചിരിക്കുന്നത്. ഉറ്റവരും, വീടും, ഭൂമിയും നഷ്ടപ്പെട്ടവര്‍ക്ക് അടിയന്തര സഹായവും പിന്തുണയും സർക്കാർ ആനുകൂല്യങ്ങളും നേടിയെടുക്കുന്നതിനു വേണ്ട സഹായത്തിനും കെ.എസ്.സി സംസ്ഥാന നേതൃത്വം മുന്നിട്ടിറങ്ങും.1
വിദ്യാര്‍ത്ഥികള്‍ക്കുള്ള പഠനോപകരണങ്ങള്‍ പോലുള്ള ഭൗതിക സഹായങ്ങള്‍ക്കപ്പുറമെ, ദുരന്തനിവാരണത്തെക്കുറിച്ച് സമൂഹത്തെ സജ്ജരാക്കുന്നതിന് കെ.എസ്.സി ബോധവല്‍ക്കരണ സെഷനുകളും സംഘടിപ്പിക്കും. ദുരിത ബാധിതരായ ജനങ്ങള്‍ക്ക് ശാരീരികവും വൈകാരികവുമായ പിന്തുണ വാഗ്ദാനം ചെയ്യുന്ന ഒരു സമഗ്ര പദ്ധതിയാണ് സെല്‍ ലക്ഷ്യമിടുന്നത്. കൂടാതെ 24 മണിക്കൂറും പ്രവര്‍ത്തനസജ്ജമായ ഹെല്‍പ്പ് ഡെസ്‌ക്കും ആരംഭിച്ചിട്ടുണ്ട്.
2018-ലെ പ്രളയാനന്തരം മുഖ്യമന്ത്രി പിണറായി വിജയന്റെ നേതൃത്വത്തിലുള്ള സര്‍ക്കാര്‍ പ്രഖ്യാപിച്ച ‘റീബില്‍ഡ് കേരള ഇനിഷ്യേറ്റീവ്’ (ആര്‍കെഐ), ഭാവിയിലെ ദുരന്തങ്ങള്‍ക്കായി സംസ്ഥാനത്തെ സജ്ജരാക്കുന്ന വിപുലമായ നയ ചട്ടക്കൂടാണ്. എന്നാല്‍ ഇതും വഴിമുട്ടിയ അവസ്ഥയിലാണ്.
കേരളത്തിലെ ജനങ്ങളോടുള്ള കെ.എസ്.സി യുടെ പ്രതിബദ്ധത, പ്രത്യേകിച്ച് പ്രതിസന്ധി ഘട്ടങ്ങളില്‍, അതിന്റെ സജീവമായ നടപടികളിലൂടെ പ്രകടമാണ്. സംസ്ഥാനം പുനര്‍നിര്‍മ്മാണവും വീണ്ടെടുക്കലും തുടരുമ്പോള്‍, കെ.എസ്.സി പോലുള്ള സംഘടനകള്‍ നിര്‍ണായക പങ്ക്
വഹിക്കുന്നു. കേന്ദ്ര-സംസ്ഥാന ഗവണ്‍മെന്റുകള്‍ പല പദ്ധതികളും ഫലപ്രദമായി നടപ്പാക്കാന്‍ സാധിച്ചില്ല. ഈ സാഹചര്യത്തില്‍ സര്‍ക്കാര്‍ വാഗ്ദാനം ചെയ്യുന്ന ആനുകൂല്യങ്ങള്‍ ഉദ്ദേശിച്ച ഗുണഭോക്താക്കളില്‍ എത്തുന്നുവെന്ന് ഉറപ്പുവരുത്തുകയാണ് കെ.എസ്.സിയെന്നും പൊതുജനങ്ങളുടെ പരാതികള്‍ കാര്യക്ഷമമായി പരിഹരിക്കുക എന്നതാണ് സെല്ലിന്റെ പ്രാഥമിക പ്രവര്‍ത്തനങ്ങളില്‍ പ്രധാനമെന്നും കെ.എസ്.സി സംസ്ഥാന പ്രസിഡന്റ് ജോണ്‍സ് കുന്നപ്പിള്ളി പറഞ്ഞു.
കെ.എസ്. സി സംസ്ഥാന സെക്രട്ടറിയേറ്റ് അംഗങ്ങളായ അഡ്വ. ജോർജ് ജോസഫ്, നോയൽ ലൂക്ക്, മരീനാ മോൻസ്, അഭിഷേക് ബിജു, തേജസ്.ബി. തറയിൽ, എഡ്വിൻ ജോസ്, ജോർജ് മാത്യു, ജെൻസ് എൽ ജോസ്, സ്റ്റീഫൻ തങ്കച്ചൻ, അനന്ദു സി.അനിൽ എന്നിവർ സെല്ലിൻ്റെ വിവിധ പ്രവർത്തനങ്ങൾ ഏകോപിപ്പിക്കും.
കെ.എസ്. സി കോമണ
സര്‍വീസ് സെൽ
ഹെല്‍പ്പ് ഡെസ്‌ക് നമ്പരുകൾ :
8589833999
8304826515
8113999123
