ന്യൂഡല്‍ഹി: വഖഫ് നിയമ ഭേദഗതി ബില്‍ രാജ്യസഭയിലും പാസായി. വോട്ടെടുപ്പില്‍ 128 പേര്‍ ബില്ലിനെ അനുകൂലിച്ചപ്പോള്‍ 95 പേര്‍ എതിര്‍ത്തു.കഴിഞ്ഞ ദിവസം ബില്‍ ലോക്‌സഭ പാസാക്കിയിരുന്നു. ഇതോടെ ബില്‍ പാര്‍ലമെന്റ് കടന്നു. ഇനി രാഷ്ട്രപതിയുടെ അംഗീകാരത്തിനായി അയക്കും. രാഷ്ട്രപതി ബില്ലില്‍ ഒപ്പിട്ടാല്‍ നിയമമാകും. മണിക്കൂറുകള്‍ നീണ്ട ചര്‍ച്ചക്ക് ശേഷമായിരുന്നു വോട്ടെടുപ്പ്. വോട്ടെടുപ്പില്‍ പ്രതിപക്ഷ അംഗങ്ങളുടെ നിര്‍ദേശം വോട്ടിനിട്ട് തള്ളി.
ബില്‍ രാജ്യസഭ കടന്നതോടെ മുനമ്ബത്ത് പടക്കം പൊട്ടിച്ചും പ്രകടനം നടത്തിയും സമരക്കാരുടെ ആഹ്ലാദ പ്രകടനം. കേന്ദ്രം സര്‍ക്കാരിനെ പിന്തുണച്ച്‌ സമരം ചെയ്യുന്നവര്‍ പ്രകടനം നടത്തി. നിയമഭേദഗതിയെ എതിര്‍ത്ത കേരളത്തിലെ എംപിമാരെ വിമര്‍ശിച്ചപ്പോള്‍ സുരേഷ് ഗോപിക്ക് കൈയടി. റവന്യു അവകാശങ്ങള്‍ പുനഃസ്ഥപിക്കുന്നത് വരെ സമരം തുടരുമെന്നും മുനമ്ബം സമര സമിതി അറിയിച്ചു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
വഖഫ് നിയമ ഭേദഗതി ബില്‍ ലോക്‌സഭയില്‍ കഴിഞ്ഞ ദിവസം പുലര്‍ച്ചെ രണ്ട് മണിയോടെ പാസായിരുന്നു. 232 വോട്ടിനെതിരെ 288 വോട്ടോടെയാണ് പാസായത്. 14 മണിക്കൂറിലേറെ നീണ്ട നടപടികള്‍ക്ക് ശേഷമാണ് ബില്‍ ലോക്‌സഭ കടന്നത്. രാജ്യസഭയിലും മണിക്കൂറുകള്‍ ചര്‍ച്ച നീണ്ടു. ലോക്‌സഭയിലും രാജ്യസഭയിലും പ്രതിപക്ഷ അംഗങ്ങള്‍ അവതരിപ്പിച്ച ഭേദഗതികള്‍ വോട്ടിനിട്ട് തള്ളി. കെ.സി. വേണുഗോപാല്‍, ഇ.ടി. മുഹമ്മദ് ബഷീര്‍, കെ. രാധാകൃഷ്ണന്‍, എന്‍.കെ. പ്രേമചന്ദ്രന്‍ എന്നിവരുടെ നിര്‍ദേശങ്ങളും വോട്ടിനിട്ട് തള്ളി.
വഖഫ് സ്വത്തുക്കളെ നിയന്ത്രിക്കുന്ന 1995 ലെ നിയമം ഭേദഗതി ചെയ്യുന്നതിനാണ് കേന്ദ്ര സര്‍ക്കാര്‍ ബില്‍ അവതരിപ്പിച്ചത്. ബില്‍ ഇന്നുതന്നെ രാജ്യസഭയിലും അവതരിപ്പിക്കും. ബില്‍ പരിശോധിക്കാന്‍ രൂപീകരിച്ച സംയുക്ത പാര്‍ലമെന്ററി സമിതി തങ്ങളുടെ നിര്‍ദ്ദേശങ്ങള്‍ പരിഗണിച്ചില്ലെന്ന് പ്രതിപക്ഷം വാദിച്ചു. ബില്‍ ഭരണഘടനാ വിരുദ്ധമാണെന്നും സര്‍ക്കാര്‍ ന്യൂനപക്ഷങ്ങളെ അപകീര്‍ത്തിപ്പെടുത്താനും അവകാശങ്ങള്‍ നിഷേധിക്കാനും ശ്രമിക്കുകയാണെന്നും ഭരണഘടനയ്ക്കെതിരെ 4ഡി ആക്രമണം നടത്തുകയാണെന്നും കോണ്‍ഗ്രസ് പ്രഖ്യാപിച്ചു.
ചര്‍ച്ചയില്‍ ഉടനീളം മുനമ്ബമുയര്‍ത്തി കേരള എംപിമാരും കേന്ദ്രമന്ത്രിമാരും ഏറ്റുമുട്ടി.. ബില്‍ ഒരു മതത്തിനും എതിരല്ലെന്നും വഖഫ് സ്വത്തുക്കള്‍ സുതാര്യവും കാര്യക്ഷമവും ആക്കുന്നതിന് അനിവാര്യമാണെന്നുമായിരുന്നു സര്‍ക്കാര്‍ വാദം. ബില്ലിലെ വ്യവസ്ഥകള്‍ ഭരണഘടനാ വിരുദ്ധവും മുസ്ലിം വിരുദ്ധവുമാണെന്നും സര്‍ക്കാരിന്റെ ലക്ഷ്യം വര്‍ഗീയ ധ്രുപീകരണമാണെന്നും പ്രതിപക്ഷം കുറ്റപ്പെടുത്തി. ബില്ലിലെ ഏതു വ്യവസ്ഥയാണ് മുനമ്ബം പ്രശ്നം പരിഹരിക്കുകയെന്ന ചോദ്യത്തിന് ഭരണപക്ഷത്തിന് മറുപടിയുണ്ടായിരുന്നില്ല. കത്തോലിക്കാ സഭ നേതൃത്വത്തിനൊപ്പം നിന്നും എല്‍ഡിഎഫിനെ പിണക്കാതെയുമായിരുന്നു ജോസ് കെ മാണി നിലപാട് വ്യക്തമാക്കിയത്.
ബില്ലിനെ എതിര്‍ത്ത ജോസ് കെ മാണി രണ്ടു ഭേദഗതികളെ പിന്തുണച്ചു. ബില്ലിനെതിരെ നിയമനടപടിക്ക് ഒരുങ്ങുകയാണ് മുസ്ലിം ലീഗും ഡിഎംകെയും. മുസ്ലിം വ്യക്തി നിയമ ബോര്‍ഡ് രാജ്യവ്യാപക പ്രക്ഷോഭം ഉടന്‍ ആരംഭിക്കും. വഖഫ് ബോര്‍ഡുകളുടെ സ്വേച്ഛാപരമായ ഭൂമി ഏറ്റെടുക്കല്‍ തടയുന്നതിനുള്ള പരിഷ്‌കാരങ്ങളെ പൂര്‍ണമായും പിന്തുണയ്ക്കുന്നതായി ജോസ് കെ. മാണി രാജ്യസഭയില്‍ വിശദീകരിക്കുകയും ചെയ്തു. അതേസമയം സെന്‍ട്രല്‍ വഖഫ് കൗണ്‍സിലിലും വഖഫ് ബോര്‍ഡുകളിലും മുസ്ലിംകളല്ലാത്ത അംഗങ്ങളെ അനുവദിക്കുന്ന വ്യവസ്ഥകളെ ശക്തിയായി എതിര്‍ക്കുന്നതായും വഖഫ് ഭേദഗതി ബില്ലിനെക്കുറിച്ചുള്ള ചര്‍ച്ചയില്‍ പങ്കെടുത്തുകൊണ്ട് അദ്ദേഹം പറഞ്ഞു.
ന്യൂനപക്ഷങ്ങളുടെ മതകാര്യങ്ങളില്‍ കൈകടത്തുന്ന ബില്ലിലെ വ്യവസ്ഥകളെ എതിര്‍ക്കുന്നതായും ജോസ് കെ. മാണി പറഞ്ഞു. അതായത് ബില്ലിനെ എതിര്‍ക്കുകയും അനുകൂലിക്കുകയും ചെയ്തു. കേരളത്തിലെ ക്രൈസ്തവ രാഷ്ട്രീയം എതിരാകാതിരിക്കാനുള്ള മുന്‍ കരുതലാണ് കെഎം മാണിയുടെ മകന്‍ ജോസ് കെ മാണി സഭയില്‍ എടുത്തത്.
തന്റെ പാര്‍ട്ടിയായ കേരള കോണ്‍ഗ്രസ്-എം വഖഫ് ബോര്‍ഡ് തീരുമാനങ്ങളെ കോടതിയില്‍ ചോദ്യം ചെയ്യാമെന്ന ബില്ലിലെ വ്യവസ്ഥയെ സ്വാഗതം ചെയ്യുന്നുവെന്ന് ജോസ് കെ. മാണി വ്യക്തമാക്കി. രാജ്യം എപ്പോഴും മതങ്ങളുടെ അവകാശങ്ങള്‍ ഉറപ്പാക്കിയിരുന്നുവെന്നും എന്നാല്‍, ഈ സന്തുലനത്തെ തകര്‍ക്കുന്ന ജനാധിപത്യവിരുദ്ധ ശ്രമങ്ങളെ പ്രതിരോധിക്കണമെന്നും അദ്ദേഹം പറഞ്ഞു. ഈ ഭേദഗതികൊണ്ട് മുനന്പത്തെയും സമാനമായ മറ്റിടങ്ങളിലെയും പ്രശ്നം പരിഹരിക്കാനാകുമോ എന്നദ്ദേഹം ചോദിച്ചു. ഭേദഗതിയിലൂടെ മുനന്പത്തെ പ്രശ്നം പരിഹരിക്കുമെന്ന് മന്ത്രി ഉറപ്പുനല്‍കണമെന്നും അദ്ദേഹം ആവശ്യപ്പെട്ടു. മുനന്പം പ്രശ്നം പരിഹരിക്കുന്നതിനുള്ള വ്യവസ്ഥ ബില്ലിലുണ്ടാകുമെന്ന് പ്രതീക്ഷിച്ചിരുന്നു.
എന്നാല്‍ ഇപ്പോഴത്തെ അവസ്ഥയില്‍ നിലവില്‍ ട്രൈബ്യൂണലുകളുടെയും കോടതികളുടെയും പരിഗണനയിലുള്ള കേസുകളില്‍ ഇത് ആശ്വാസം നല്‍കുന്നില്ല. നിലവിലുള്ള കേസുകളിലേക്കുകൂടി നീളുന്ന വ്യവസ്ഥയില്ലെങ്കില്‍ ഉദ്ദേശിക്കുന്ന പരിഹാരം സാധ്യമല്ല. അതുകൊണ്ട് നിയമപരമായ അടിയന്തര ഇടപെടല്‍ ആവശ്യമാണ്. നിലവില്‍ വഖഫ് ബോര്‍ഡുകള്‍ ശക്തമായ സ്വയംഭരണാവകാശത്തോടെയാണ് നിലകൊള്ളുന്നതെന്നും ഏതു ഭൂമിയും വഖഫാക്കി മാറ്റാനുള്ള അധികാരം അവര്‍ക്കുണ്ടെന്നും ജോസ് കെ. മാണി ചൂണ്ടിക്കാട്ടി. വഖഫ് ബോര്‍ഡ് അവകാശം ഉന്നയിച്ചതുകൊണ്ട് 610 കുടുംബങ്ങള്‍ ഭൂമി നഷ്ടപ്പെടുമോയെന്നുള്ള ഭീതിയിലാണെന്നും എംപി പറഞ്ഞു.
യഥാര്‍ഥ വഖഫ് നിയമത്തിലെ നീതിരഹിത വ്യവസ്ഥകളെ എതിര്‍ക്കുന്ന മതനേതാക്കന്മാരുടെയും ബിഷപ്പുമാരുടെയും നിലപാടിനൊപ്പമാണ് താനെന്ന് എംപി വ്യക്തമാക്കി. നിലവില്‍ വഖഫ് ബോര്‍ഡുകള്‍ ഭൂമി തങ്ങളുടേതാണെന്ന് അവകാശപ്പെടുമ്ബോള്‍ വഖഫ് ട്രൈബ്യൂണലുകളെ മാത്രമേ സമീപിക്കാന്‍ സാധിക്കൂവെന്നും ഇവര്‍ മിക്കവാറും ബോര്‍ഡുകള്‍ക്ക് അനുകൂലമായാണ് വിധി നല്‍കുന്നതെന്നും അദ്ദേഹം പറഞ്ഞു. കേരളത്തില്‍നിന്ന് സുരേഷ് ഗോപി ഒഴികെ 18 അംഗങ്ങള്‍ എതിര്‍ത്ത് വോട്ട് ചെയ്തു. പ്രിയങ്ക ഗാന്ധി വിദേശത്തായിരുന്നതിനാല്‍ ഹാജരായില്ല.
1995ലെ വഖഫ് നിയമത്തിലാണ് ഭേദഗതി. ഓഗസ്റ്റില്‍ ബില്‍ അവതരിപ്പിച്ച ശേഷം സംയുക്ത പാര്‍ലമെന്ററി സമിതിയുടെ (ജെപിസി) പരിഗണനയ്ക്കു വിട്ടിരുന്നു. ജെപിസിയുടെ നിര്‍ദേശങ്ങള്‍ അനുസരിച്ച്‌ പരിഷ്‌കരിച്ച ബില്‍ ആണ് ലോക്സഭയും പിന്നാലെ രാജ്യസഭയും പാസാക്കിയത്. കേന്ദ്ര ന്യൂനപക്ഷകാര്യമന്ത്രി കിരണ്‍ റിജിജുവാണ് ബില്‍ അവതരിപ്പിച്ചത്.