പത്തനംതിട്ട: ക്രിസ്മസിനോട് അനുബന്ധിച്ച് ദേവാലയങ്ങളില്‍ തിരുപ്പിറവി ശുശ്രൂഷയും ദിവ്യബലിയും അര്‍പ്പിച്ചു. പത്തനംതിട്ട പരുമല സെമിനാരിയില്‍ നടന്ന ജനനപ്പെരുന്നാള്‍ ശുശ്രൂഷയ്ക്ക് മലങ്കര സഭയുടെ പരമാധ്യക്ഷന്‍ പ. ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവ പ്രധാന കാര്‍മികത്വം വഹിച്ചു. കൊച്ചിയില്‍ കാക്കനാട് മൗണ്ട് സെന്റ് തോമസില്‍ നടന്ന പാതിരാ കുര്‍ബാനയ്ക്ക് കര്‍ദ്ദിനാള്‍ മാര്‍ ജോര്‍ജ് ആലഞ്ചേരി നേതൃത്വം നല്‍കി. എകീകൃത കുര്‍ബാന ക്രമം അനുസരിച്ചാണ് കര്‍ദിനാള്‍ ദിവ്യ ബലി അര്‍പ്പിച്ചത്.
അതേസമയം സെന്റ് മേരീസ് ബസിലിക്കയില്‍ ജനാഭിമുഖ കുര്‍ബാന നടന്നു. പള്ളി വികാരി ഫാദര്‍ ഡേവിഡ് മാടവന കാര്‍മികത്വം വഹിച്ചു. എറണാകുളം സെന്റ് ഫ്രാന്‍സിസ് അസീസി കത്തീഡ്രലില്‍ വരാപ്പുഴ അതിരൂപത മെത്രാപ്പോലീത്ത ഡോ. ജോസഫ് കളത്തിപ്പറമ്പില്‍ തിരുപ്പിറവി ദിവ്യബലി അര്‍പ്പിച്ചു. പുത്തന്‍കുരിശ് സെന്റ് അത്താനാസിയോസ് കത്തീഡ്രലില്‍ ക്രിസ്തുമസ് ശുശ്രൂഷകള്‍ക്കു ശ്രേഷ്ഠ കാതോലിക്ക ബാവ പ്രധാന കാര്‍മികത്വം വഹിച്ചു.കരിങ്ങാച്ചിറ ജോര്‍ജ് യാക്കോബായ സുറിയാനി കത്തീഡ്രലില്‍ ശുശ്രൂഷകള്‍ക്ക് പരിശുദ്ധ യാക്കോബായ സുറിയാനി സഭയുടെ മെത്രാപ്പോലീത്തന്‍ ട്രസ്റ്റി ജോസഫ് മാര്‍ ഗ്രിഗോറിയോസ് മെത്രാപ്പോലീത്ത മുഖ്യകാര്‍മികത്വം വഹിച്ചു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
കോട്ടയം പഴയ സെമിനാരിയില്‍ നടന്ന ക്രിസ്മസ് ശുശ്രൂഷകള്‍ക്ക് നിലയ്ക്കല്‍ ഭദ്രാസനാധിപന്‍ ഡോ.ജോഷ്വാ മാര്‍ നിക്കോദിമോസ് പ്രധാന കാര്‍മികത്വം വഹിച്ചു. സെമിനാരി മാനേജര്‍ ഫാ.ജോബിന്‍ വര്‍ഗീസ് സഹകാര്‍മികത്വം വഹിച്ചു. മാറുന്ന കാലഘട്ടത്തിലും,ജീവിത സാഹചര്യത്തിലും ക്രിസ്മസ് നല്‍കുന്ന സന്ദേശം മാനവരാശിക്ക് പ്രത്യാശയും, പ്രതീക്ഷയും നല്‍കുന്നതാണന്ന് മാര്‍ത്തോമ സഭാ പരമാധ്യക്ഷന്‍ ഡോ. തിയഡോഷ്യസ് മാര്‍ത്തോമ മെത്രാപ്പോലീത്ത ക്രിസ്മസ് സന്ദേശത്തില്‍ പറഞ്ഞു.