കോട്ടയം : കുമരകം വൈക്കം റോഡിൽ കൈപ്പുഴമുട്ട് പോളക്കുളം ഗ്രീൻ വാലി ബാറിന് സമീപം വാഹനാപകടം. നിയന്ത്രണംവിട്ട കാറും ബൈക്കും കൂട്ടിയിടിച്ച് രണ്ട് യുവാക്കൾക്ക് ഗുരുതരമായി പരിക്കേറ്റു. ഇല്ലിക്കൽ സ്വദേശി അഭിജിത് (19), തെക്കും ഗോപുരം സ്വദേശി പ്രിൻസ് (19) എന്നിവരെ പരിക്കുകളോടെ കോട്ടയം മെഡിക്കൽ കോളേജ് ആശുപത്രി അത്യാഹിത വിഭാഗത്തിൽ പ്രവേശിപ്പിച്ചു. അഭിജിത്തിൻറെ നില ഗുരുതരമാണെന്നാണ് ലഭിക്കുന്ന സൂചന.
വ്യാഴാഴ്ച വൈകിട്ട് ആറരയോടുകൂടി കോട്ടയം കുമരകം വൈക്കം റോഡിൽ കൈപ്പുഴ മുട്ട് പോളക്കുളം ബാറിനു സമീപമാണ് അപകടമുണ്ടായത്. ഇരുവരും സഞ്ചരിച്ചിരുന്ന സ്‌പ്ലെണ്ടർ ബൈക്ക് കോട്ടയം ഭാഗത്തേക്ക് വരികയായിരുന്നു. ഇതിനിടെ എതിർ ദിശയിൽ നിന്നും എത്തിയ കാർ നിയന്ത്രണം നഷ്ടമായി ഇവർ സഞ്ചരിച്ചിരുന്ന ബൈക്കിൽ ഇടിച്ചു. ഇടിയുടെ ആഘാതത്തിൽ ബൈക്ക് റോഡിൽ നിന്നും താഴേക്ക് മറിഞ്ഞു. സമീപത്തെ പോസ്റ്റിൽ ഇടിച്ചാണ് കാർ നിന്നത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഈ സമയം ഓടിക്കൂടിയ നാട്ടുകാരും ഇതുവഴിയെത്തിയ പോലീസ് സംഘവും ചേർന്നാണ് പരിക്കേറ്റ രണ്ടു യുവാക്കളെയും കോട്ടയം മെഡിക്കൽ കോളേജ് ആശുപത്രിയിൽ എത്തിച്ചത്. അപകടത്തെ തുടർന്ന് കുമരകം വൈക്കം റോഡിൽ ഗതാഗത തടസവും ഉണ്ടായി. പോസ്റ്റ് തകർന്നതിനെ തുടർന്ന് പ്രദേശത്ത് വൈദ്യുതി ബന്ധവും തകരാറിൽ ആയിട്ടുണ്ട്.
