കൂരോപ്പടയിൽ ഒമിനി വാനിടിച്ച് കാൽനടയാത്രക്കാരനായ വയോധികൻ മരിച്ചു; മരിച്ചത് ചിങ്ങവനം സ്വദേശിയായ ഹോട്ടൽ ഉടമ

പുതുപ്പള്ളി : കൂരോപ്പട ചെമ്പരത്തിമൂട്ടിൽ കാൽനടയാത്രക്കാരനായ വയോധികൻ കാറിടിച്ച് മരിച്ചു. കൂരോപ്പട കുഴുപ്പള്ളിൽ ബിൽഡിംഗിൽ ഹോട്ടൽ നടത്തുന്ന ചിങ്ങവനം സ്വദേശി തടത്തിൽ പറമ്പിൽ വേണുവാണ് (67) ചൊവ്വ രാവിലെ ചെമ്പരത്തിമൂടിന് സമീപമുണ്ടായ വാഹനാ അപകടത്തിൽ മരിച്ചത്.

കൂരോപ്പട എരുത്തുപുഴ സ്വദേശി കുന്നപ്പള്ളി അഭിലാഷിന്റെ ഒമിനി വാനാണ് ഇടിച്ചത്. കൂരോപ്പട കവല ഭാഗത്തേക്ക് നടന്ന് പോകുകയായിരുന്ന വേണുവിനെ പിന്നിൽ നിന്നെത്തിയ ഒമിനി വാൻ ഇടിച്ച് തെറിപ്പിക്കുകയായിരുന്നു.

ഉടൻ തന്നെ പാമ്പാടി താലൂക്ക് ആശുപത്രിയിലും തുടർന്ന് കോട്ടയം മെഡിക്കൽ കോളജിലും എത്തിച്ചെങ്കിലും ജീവൻ രക്ഷിക്കാനായില്ല.
അഞ്ച് മാസത്തോളമായി വേണുവും ഭാര്യയും ചേർന്ന് കൂരോപ്പടയിൽ ഹോട്ടൽ നടത്തി വരികയായിരുന്നു. സംസ്ക്കാരം പിന്നീട് .
ഭാര്യ : പുഷ്പവല്ലി (കൊച്ചു പറമ്പിൽ കുടുംബാംഗം), മക്കൾ : വിനീഷ്, വിനീത്, മരുമകൾ ശ്രുതി.