കോട്ടയം: കെ.കെ റോഡിൽ പാമ്പാടി ആർ.ഐ.ടിയ്ക്കു സമീപം സമ്മർസാൻഡ് ബാറിനു മുന്നിൽ ബൈക്കുകൾ കൂട്ടിയിടിച്ച് നാലു പേർക്ക് പരിക്ക്. ബൈക്കിലെത്തിയ മൂന്നു യുവാക്കൾക്കും, എതിർ ദിശയിൽ നിന്നും ബൈക്കിലെത്തിയ മറ്റൊരാൾക്കുമാണ് പരിക്കേറ്റത്. ഗുരുതരമായി പരിക്കേറ്റ നാലു പേരെയും ആദ്യം പാമ്പാടി താലൂക്ക് ആശുപത്രിയിലും പിന്നീട് കോട്ടയം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ബുധനാഴ്ച വൈകിട്ട് 08.15 ഓടെയായിരുന്നു അപകടം. പാമ്പാടി ഭാഗത്തു നിന്നും കോട്ടയം ഭാഗത്തേയ്ക്കു വരികയായിരുന്നു യുവാക്കൾ സഞ്ചരിച്ച ബൈക്ക്. ഈ സമയം എതിർ ദിശയിൽ നിന്നും എത്തിയ ബൈക്കുമായി ഇവർ സഞ്ചരിച്ച ബൈക്ക് കൂട്ടയിടിച്ചു. ഇടിയുടെ ആഘാതത്തിൽ യുവാക്കൾ റോഡിൽ തെറിച്ചു വീണു. ഓടിക്കൂടിയ നാട്ടുകാർ ചേർന്നാണ് പരിക്കേറ്റവരെ ആശുപത്രിയിൽ പ്രവേശിപ്പിച്ചത്. അപകടത്തെ തുടർന്ന് കെ.കെ റോഡിൽ നേരിയ ഗതാഗത തടസവും ഉണ്ടായി.
