പിണറായി – പി സി പോര് വീണ്ടും മുറുകുന്നു  ; വി.എസ്​.അച്യൂതാനന്ദൻ എതിർത്ത ടോറസ്​ പദ്ധതി പിണറായി സർക്കാർ നടപ്പിലാക്കി ; വലിയ  അഴിമതി കഥകൾ പുറത്ത് വരാനുണ്ട് ; തെളിവുകൾ ഇ.ഡിക്ക് നൽകും ; മുഖ്യമന്ത്രിയ്ക്കെതിരെ പുതിയ ആരോപണവുമായി പി.സി ജോർജ്

കോട്ടയം : വീട്ടിൽ റെയ്ഡ് നടന്നതിന് പിന്നാലെ മുഖ്യമന്ത്രി പിണറായി വിജയനെതിരെ അടുത്ത വെളിപ്പെടുത്തലുമായി പി സി ജോർജ് . വി.എസ്​.അച്യൂതാനന്ദൻ എതിർത്ത ടോറസ്​ പദ്ധതി പിണറായി സർക്കാർ നടപ്പിലാക്കിയെന്നും ഇതിൽ അഴിമതിയുണ്ടെന്നുമാണ് പി.സി.ജോർജിന്റെ പുതിയ ആരോപണം. ​2014ൽ ഉമ്മൻചാണ്ടി സർക്കാരി​ന്‍റെ കാലത്താണ്​ അമേരിക്കൻ കമ്പനിയായ ടോറസ്​ ഇൻവെസ്റ്റ്​മെന്‍റിന്‍റെ നേതൃത്വത്തിൽ ടെക്​നോപാർക്കിൽ ‘ഡൗൺ ടൗൺ’ എന്ന പേരിലുള്ള പദ്ധതി ആവിഷ്​ക്കരിച്ച​ത്​. എന്നാൽ വി.എസ്​.എതിർത്തതോടെ അന്ന്​ ഉപേക്ഷിച്ച പദ്ധതിക്ക്​ പിന്നീട്​ അധികാരത്തിലെത്തിയ  പിണറായി വിജയൻ അനുമതി നൽകി.

ഇതിൽ ബാഹ്യ ഇടപെടലുകളുണ്ടെന്നും വൻ അഴിമതിയാണ്​ നടന്നിരിക്കുന്നതെന്നും ജോർജ്​ വാർത്താസ​മ്മേളനത്തിൽ ആരോപിച്ചു. ടോറസ്​ കമ്പനിക്ക്​ പദ്ധതിക്കായി 19.73 ഏക്കർ സ്ഥം വിട്ടുകൊടുത്തു. വയലും തണ്ണീർതടവും ഉൾപ്പെട്ട സ്ഥലം അതിവേഗത്തിലാണ്​ കൈമാറിയത്​. ഇതിനുപിന്നിൽ ഫാരിസ്​ അബൂബക്കറാണെന്നും അദേഹം പറഞ്ഞു. ഈ പദ്ധതിയുമായി ബന്ധപ്പെട്ട്​  പ്രവർത്തിക്കുന്ന സ്ഥാപനങ്ങൾ പലതും കടലാസ്​ കമ്പനികളാണ്​. ഇതിന്‍റെ ഡയറക്ടർമാരെക്കുറിച്ച്​ വിശദമായി അന്വേഷിക്കണം. വീണ വിജയന്​ ഇവരുമായുള്ള ബന്ധം കണ്ടെത്താൻ എക്സാലോജിക്​ സൊല്യൂഷൻസിന്‍റെ  അക്കൗണ്ടുകൾ പരിശോധിക്കണം. ‘ഡൗൺ ടൗൺ’ പദ്ധതിയുമായി ബന്ധ​​പ്പെട്ട അഴിമതിയുടെ രേഖകൾ തന്‍റെ കൈവശമുണ്ടെന്നും ഇത്​ ഇ.ഡിക്ക്​ ​കൈമാറുമെന്നും അദേഹം പറഞ്ഞു.

ഐ.ടിവകുപ്പിൽ വൻ അഴിമതിയാണ്​ നടക്കുന്നത്​. ചെന്നൈ ആസ്ഥാനമായ ബ്രിഗേഡ്​ ഗ്രൂപ്പിന്​ വേൾഡ് ട്രേഡ് സെന്റർ നിർമ്മിക്കാൻ പന്ത്രണ്ടേക്കർ ഭൂമിയാണ്​ പിണറായി സർക്കാർ നൽകിയത്. ഈ ഭൂമി ഇടപാടിലും സമഗ്രമായ അന്വേഷണം വേണം.  കിഫ്‌ബി ധനസഹായത്തിനായി ഇറക്കിയിട്ടുള്ള മസാല ബോണ്ടുകളുടെ വിപണനവുമായി ബന്ധപ്പെട്ട ഇടപാടുകൾ നിയന്ത്രിക്കുന്നത് അബുദാബിയിൽ പ്രവർത്തിക്കുന്ന സ്ഥാപനമാണ്​. ഇവർ ഹാൻഡിലിങ് ചാർജും,കമ്മീഷനും കൈപ്പറ്റുന്നുണ്ട്.
ഈ സ്ഥാപനത്തെ സംബന്ധിച്ചും ഈ സ്ഥാപനത്തിന്റെ  ഷെയർ ഹോൾഡേഴ്സിനെ സംബന്ധിച്ചും സമഗ്രമായ അന്വേഷണം നടത്തണമെന്നും പി സി ജോർജ് വാർത്താ സമ്മേളനത്തിലൂടെ ആവശ്യപ്പെട്ടു.