കോട്ടയം: പാമ്പാടി ഒൻപതാം മൈലിൽ ടാങ്കർ ലോറി തലയിലൂടെ കയറിയിറങ്ങി വയോധികന് ദാരുണാന്ത്യം. കെ.കെ റോഡിൽ പാമ്പാടി ഒൻപതാം മൈലിലെ വളവിലായിരുന്നു അപകടം. പ്രദേശത്തെ പെട്രോൾ പമ്പിനു സമീപത്തെ വളവിൽ വച്ചാണ് കാൽനടയാത്രക്കാരനെ ടാങ്കർ ലോറി ഇടിച്ചു വീഴ്ത്തിയത്. കാൽനടയാത്രക്കാരൻ കങ്ങഴ കുമ്മംദാനം സ്വദേശി കുട്ടപ്പനാ(75)ണ് മരിച്ചത്. കെകെ റോഡിൽ കോട്ടയം ഭാഗത്തു നിന്നും കുമളി ഭാഗത്തേയ്ക്കു പോകുകയായിരുന്നു ടാങ്കർ ലോറി.
ഈ സമയം റോഡിലൂടെ നടന്നു പോകുകയായിരുന്ന കുട്ടപ്പനെ ടാങ്കർ ലോറി ഇടിച്ചു വീഴ്ത്തിയ ശേഷം ഇദ്ദേഹത്തിന്റെ തലയിലൂടെ ലോറി കയറിയിറങ്ങുകയായിരുന്നു. ഓടിക്കൂടിയ നാട്ടുകാർ ചേർന്നാണ് ഇദ്ദേഹത്തെ ആശുപത്രിയിലേയ്്ക്കു മാറ്റാൻ ശ്രമിച്ചത്. എന്നാൽ, മരണം സംഭവിച്ചിരുന്നു. ലോറി പാമ്പാടി പൊലീസ് കസ്റ്റഡിയിൽ എടുത്തു. എന്നാൽ, അപകടകാരണം എന്താണ് എന്ന് കൃത്യമായ വിവരമില്ലെന്നു പാമ്പാടി പൊലീസ് അറിയിച്ചു. വിശദമായ അന്വേഷണം നടത്തുമെന്നും പൊലീസ് അറിയിച്ചു.
