കോട്ടയം : ആരോഗ്യശാസ്ത്ര സർവ്വകലാശാലയുടെ ഏഴാമത് ഇന്റർസോൺ കലോത്സവം ഒക്ടോബർ 14, 15, 16 തീയതികളിലായി കോട്ടയം മെഡിക്കൽ കോളേജിൽ വച്ച് നടക്കുകയാണ്. കേരളത്തിലുടനീളമുള്ള , ആരോഗ്യ സർവ്വകലാശാലയ്ക്ക് കീഴിലെ 324 കോളേജുകളിൽ നിന്ന് നോർത്ത് സോൺ , സൗത്ത് സോൺ, സെൻട്രൽ സോൺ എന്നിങ്ങനെ മൂന്ന് സോണുകളായി തിരിച്ച മത്സരങ്ങളിൽ വിജയികളായ 4000 ത്തോളം വിദ്യാർത്ഥികളാണ് ഇന്റർസോൺ കലോത്സവത്തിന് കോട്ടയത്തെത്തുന്നത്.
10 വേദികളിലായി 96 മത്സരങ്ങളാണ് അരങ്ങേറുന്നത്. യൂണിവേഴ്സിറ്റി വൈസ് ചാൻസലർ മോഹനൻ കുന്നുമ്മേൽ , ചലച്ചിത്ര താരം സൗബിൻ ഷാഹിർ ഉൾപ്പെടെ രോമാഞ്ചം സിനിമയിലെ അഭിനേതാക്കാൾ എന്നിവർ ഉദ്ഘാടന പരിപാടിയുടെ ഭാഗമാകും. ഇതോടൊപ്പം ആരോഗ്യ സർവകലാശാലയുടെ ലഹരി വിരുദ്ധ ക്യാമ്പയിനിന്റെ ആരംഭം കൂടി ഇന്റർസോൺ കലോത്സവത്തോടൊപ്പം നടത്തുന്നതാണ്. പത്ര സമ്മേളനത്തിൽ യൂണിവേഴ്സിറ്റി യൂണിയൻ ചെയർപേഴ്സൺ ആർഷ അന്ന പത്രോസ്, കോട്ടയം മെഡിക്കൽ കോളേജ് യൂണിയൻ ചെയർപേഴ്സൺ മഞ്ജിമ തെരേസ , കോളേജ് യൂണിയൻ ജനറൽ സെക്രട്ടറി ഷിഹാസ് നസീർ , യൂണിവേഴ്സിറ്റി യൂണിയൻ കൗൺസിലർ സാന്ദ്ര ഡേവിസ് എന്നിവർ പ്രസംഗിച്ചു.
