കോട്ടയം : വെസ്റ്റ് പൊലീസ് സ്റ്റേഷനിൽ നിന്നും ദുരൂഹ സാഹചര്യത്തിൽ കാണാതായ ഗ്രേഡ് എസ്.ഐ അനീഷ് വിജയനായി അന്വേഷണം ആരംഭിച്ച് പൊലീസ്. അനീഷിനെ കണ്ടെത്തുന്നതിനായി പൊലീസ് പ്രത്യേക അന്വേഷണ സംഘം രൂപീകരിച്ചിട്ടുണ്ട്. കോട്ടയം വെസ്റ്റ് സ്‌റ്റേഷൻ ഹൗസ് ഓഫിസർ ഇൻസ്‌പെക്ടർ കെ.ആർ പ്രശാന്ത്കുമാറിന്റെ നേതൃത്വത്തിലുള്ള സംഘമാണ് അന്വേഷണം ആരംഭിച്ചിരിക്കുന്നത്. വെള്ളിയാഴ്ച മുതലാണ് കോട്ടയം വെസ്റ്റ് പൊലീസ് സ്റ്റേഷനിലെ ഗ്രേഡ് എസ്.ഐ പത്തനംതിട്ട കീഴ് വായ്പൂർ സ്വദേശി അനീഷ് വിജയനെ കാണാതായത്. ഡ്യൂട്ടിയ്ക്ക് ശേഷം സ്റ്റേഷനിൽ നിന്നും പോയ അനീഷ് വീട്ടിൽ എത്താതെ വന്നതോടെ ബന്ധുക്കൾ കോട്ടയം വെസ്റ്റ് പൊലീസിൽ പരാതി നൽകുകയായിരുന്നു.
തുടർന്ന് പൊലീസ് എഫ്.ഐ.ആർ രജിസ്റ്റർ ചെയ്ത് അന്വേഷണം ആരംഭിച്ചു. കോട്ടയം കെ.എസ്.ആർ.ടി.സി ഭാഗത്ത് വച്ച് അനീഷിന്റെ ഫോൺ സ്വിച്ച് ഓഫ് ആയതായാണ് വിവരം. ഇതിന് ശേഷം ഫോൺ ഓൺആയിട്ടില്ല. ഇവിടെ നിന്നുള്ള സിസിടിവി ക്യാമറാ ദൃശ്യങ്ങൾ പിൻതുടർന്ന പൊലീസ് സംഘം അനീഷ് അടൂരിൽ എത്തിയതായി കണ്ടെത്തിയിട്ടുണ്ട്. ഏതായാലും പൊലീസ് ഊർജിതമായി അന്വേഷണം ആരംഭിച്ചിട്ടുണ്ട്.