കോട്ടയം : ഓട്ടം വിടുന്നതിനെച്ചൊല്ലി കോട്ടയം നഗരമധ്യത്തിൽ ബേക്കർ ജംഗ്ഷനിൽ ടാക്സി ഡ്രൈവർമാരും – യൂബർ ടാക്സി ഡ്രൈവർമാരും തമ്മിലടിച്ചു. ചൊവ്വാഴ്ച വൈകിട്ട് അഞ്ചരയോടെയാണ് കോട്ടയം നഗര മധ്യത്തിൽ ബേക്കർ ജംഗ്ഷനിൽ ഇരു സംഘങ്ങൾ തമ്മിൽ ഏറ്റുമുട്ടിയത്. കോട്ടയത്ത് യൂബർ ടാക്സി ഡ്രൈവർമാർ ഓട്ടം ആരംഭിച്ചിരുന്നു. ഇതിനെ ചൊല്ലി ദിവസങ്ങളായി ടാക്സി ഡ്രൈവർമാർ പ്രതിഷേധം ഉയർത്തിയിരുന്നു.ഇന്നലെ രാവിലെ യൂബർ ടാക്സി ഡ്രൈവർമാരിൽ ഒരു വിഭാഗം തങ്ങളെ ജോലിചെയ്യാൻ അനുവദിക്കുന്നില്ല എന്ന് കാട്ടി കോട്ടയം വെസ്റ്റ് പോലീസ് സ്റ്റേഷനിൽ പരാതി നൽകിയിരുന്നു. ഇതിന് പിന്നാലെ കോട്ടയത്ത് യൂബർ ടാക്സി ഡ്രൈവർമാർ എത്തിയ വിവരമറിഞ്ഞ് ഒരു സംഘം ടാക്സി ഡ്രൈവർമാർ ഇവരെ തടയാൻ എത്തിയിരുന്നു. തിരുനക്കരയിൽ ഇരു വിഭാഗങ്ങൾ തമ്മിൽ തർക്കം ഉണ്ടാകുകയും , ഒരു വിഭാഗം ടാക്സി ഡ്രൈവർമാർ യൂബർ ഡ്രൈവറെ പിന്തുടർന്ന് കുമരകത്ത് വച്ച് മർദ്ദിക്കുകയും ചെയ്തു. ഇതിൽ പരാതി നൽകിയ യൂബർ ഡ്രൈവർമാർ കോട്ടയം ബേക്കർ ജംഗ്ഷനിൽ കാത്തുനിൽക്കുകയായിരുന്നു. ഇവിടെ നിന്നും യൂബർ ഓപ്പറേറ്റ് ചെയ്യുന്ന വിവരം ലഭിച്ചതിനെ തുടർന്ന് ടാക്സി ഡ്രൈവർമാർ സ്ഥലത്ത് എത്തി. തുടർന്ന് ഇരുവിഭാഗങ്ങൾ തമ്മിൽ ഏറ്റുമുട്ടൽ ഉണ്ടാവുകയായിരുന്നു. സംഭവത്തിൽ രണ്ടു കൂട്ടരും കോട്ടയം വെസ്റ്റ് പോലീസിൽ പരാതി നൽകിയിട്ടുണ്ട്.
