സ്വകാര്യ ബസ് സമരം നേരിടാൻ 500 ലോക്കൽ ബസുകൾ പണിതീർത്തത് പുറത്തിറക്കുമെന്ന്: മന്ത്രി ഗണേശ് കുമാർ”

തിരുവനന്തപുരം :സ്വകാര്യ ബസ് ഉടമകൾ സമരം ചെയ്താലും യാത്രക്കാരെ വിഷമിപ്പിക്കാതിരിക്കാൻ കെഎസ്‌ആർടിസി തയ്യാറാണെന്ന് ഗതാഗത വകുപ്പ് മന്ത്രി കെ.ബി. ഗണേശ് കുമാർ. ഇതിനായി 500ഓളം ബസുകൾ പണിതീർത്തു വച്ചിട്ടുണ്ടെന്നും മന്ത്രി വ്യക്തമാക്കി.

“സ്വകാര്യ ബസുകാർക്ക് സമരം ചെയ്യണമെങ്കിൽ ചെയ്‌തോളൂ. എന്നാൽ വിദ്യാർത്ഥികളുടെ കൺസെഷൻ വർദ്ധിപ്പിക്കണമെന്ന ആവശ്യം അനാവശ്യ പ്രശ്നങ്ങൾ സൃഷ്ടിക്കുന്ന തരത്തിലാവരുത്. ആദ്യം അവർ മത്സരയോട്ടം നിർത്തട്ടെ. കുട്ടികളുടെ നിരക്ക് വർദ്ധിപ്പിച്ച് നാട്ടിൽ വഴക്കുണ്ടാക്കാൻ അനുവദിക്കില്ല,” മന്ത്രി മാധ്യമങ്ങളോട് പറഞ്ഞു.

“ഓണക്കാലത്ത് സ്വകാര്യ ബസുകൾ റോഡിലിറങ്ങിയില്ലെങ്കിൽ കെഎസ്‌ആർടിസിയുടെ 500 ബസുകൾ പുറത്തിറങ്ങും. എല്ലാ ദിവസവും ശരാശരി 1200 ബസുകൾ വർക്ക്‌ഷോപ്പിൽ കിടന്നിരുന്നെങ്കിലും ഇന്ന് അത് 450 ആയി ചുരുങ്ങിയിട്ടുണ്ട്. അത്രയും സ്പെയർ വാഹനങ്ങൾ ഇപ്പോൾ ഞങ്ങളുടെ കൈയിൽ ഉണ്ട്. അവർ സമരം ചെയ്താൽ ബസുകൾ മുഴുവനായും ഇറക്കും,” – മന്ത്രി വ്യക്തമാക്കി.

“കുട്ടികളുടെ നിരക്ക് വർദ്ധിപ്പിക്കണമെന്ന് പറയുമ്പോൾ സമവായം നോക്കാതെ, നേരിട്ട് ചാർജ് കൂട്ടിയാൽ നാട്ടിൽ വലിയ പ്രശ്നം ഉണ്ടാകും. ആവശ്യമില്ലാതെ ജനങ്ങളെ സമരത്തിലേക്ക് തള്ളിവിട്ട് അരാജകത്വം സൃഷ്ടിക്കാനാവില്ല,” – ഗണേശ് കുമാർ പറഞ്ഞു.