കോട്ടയം: ചങ്ങനാശേരിയിലെ ദൃശ്യം മോഡൽ കൊലപാതകത്തിൽ രണ്ടു പ്രതികൾ കൂടി പിടിയിൽ. കോട്ടയം പുതുപ്പള്ളി മാങ്ങാനം സ്വദേശികളായ ബിബിൽ ബിനോയ് എന്നിവരെയാണ് കോയമ്പത്തൂരിൽ നിന്നും കോട്ടയം ജില്ലാ പൊലീസ് മേധാവി കെ.കാർത്തികിന്റെ നേതൃത്വത്തിലുള്ള പൊലീസ് സംഘമാണ് പ്രതികളെ അറസ്റ്റ് ചെയ്തത്. ആലപ്പുഴ സ്വദേശിയായ ബിന്ദുകുമാറിനെ ഇയാളുടെ സുഹൃത്തായ മുത്തുകുമാർ ചങ്ങനാശേരി പൂവത്തെ വീട്ടിലേയ്ക്കു വിളിച്ചു വരുത്തിയ ശേഷം കൊലപ്പെടുത്തുകയായിരുന്നുവെന്നാണ് വിവരം.
സംഭവത്തിൽ ഉൾപ്പെട്ട പ്രതികൾ വാർത്ത പുറത്ത് വന്നതിന് പിന്നാലെ തന്നെ സംസ്ഥാനത്തിനു പുറത്തേയ്ക്കു കടന്നിരുന്നു. തുടർന്നു ജില്ലാ പൊലീസ് മേധാവിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ച് അന്വേഷണം ആരംഭിക്കുകയായിരുന്നു. തുടർന്നാണ് കോയമ്പത്തൂരിലേയ്ക്കു കടന്ന പ്രതികളെ പൊലീസ് സംഘം പിടികൂടിയത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഭാര്യയുമായുള്ള ബന്ധം സംശയിച്ച് പ്രതിയായ മുത്തുകുമാർ ബിന്ദുകുമാറിനെ വീട്ടിലേയ്ക്കു വിളിച്ചു വരുത്തിയ ശേഷം കൊലപ്പെടുത്തി വീടിനുള്ളിൽ അടുക്കള ഭാഗത്തോട് ചേർന്ന് കുഴിയെടുത്ത് കോൺക്രീറ്റ് ചെയ്ത് മൂടുകയായിരുന്നു. സംഭവത്തിൽ ഉൾപ്പെട്ട പ്രധാനപ്രതിയായ മുത്തുകുമാറിനെ സംഭവ ദിവസം തന്നെ പൊലീസ് സംഘം പിടികൂടിയിരുന്നു. ഇതേ തുടർന്ന് വിശദമായ അന്വേഷണത്തിന് ഒടുവിലാണ് മറ്റു രണ്ടു പ്രതികളെ കൂടി പിടികൂടിയത്.
