ഇരാറ്റുപേട്ട: മൂന്നിലവ് മേച്ചാലിനു സമീപമുള്ള ബെഡ് ഫാക്ടറിയിൽ വൻ അഗ്‌നിബാധ. ലാറ്റെക്‌സുമായി വന്ന നാഷണൽ പെർമിറ്റ് ലോറിയടക്കം കത്തിനശിച്ചു. ഈരാറ്റുപേട്ട, പാലാ, കാഞ്ഞിരപ്പള്ളി എന്നിവിടങ്ങളിൽ നിന്നുളള അഗ്‌നിശമന സേനാംഗങ്ങൾ സംഭവ സ്ഥലത്തേക്ക് പുറപ്പെട്ടിട്ടുണ്ട്. എന്നാൽ പാലം തകർന്നു കിടക്കുന്നതിനാൽ വലിയ വാഹനങ്ങൾക്ക് സ്ഥലത്തേക്ക് എത്തചേരാനായിട്ടില്ല. മറ്റു വഴികളിലൂടെ സ്ഥലത്തേക്ക് എത്താനുള്ള ശ്രമത്തിലാണ് അഗ്‌നിശമന സേനാ യൂണിറ്റുകൾ. നാട്ടുകാരുടെ നേതൃത്വത്തിൽ തീയണയ്ക്കുന്നതിനുള്ള ശ്രമങ്ങൾ തുടരുകയാണ്. നാട്ടുകാർ ആറ്റിൽ നിന്നും മോട്ടോർ ഉപയോഗിച്ച് വെള്ളം പമ്പു ചെയ്തും രക്ഷാപ്രവർത്തനത്തിന് മുന്നിലുണ്ട്. ഇന്നു വൈകുന്നേരം ഏഴു മണിക്കു ശേഷമാണ് തീപിടുത്തം ഉണ്ടായത്. അതിഥി തൊഴിലാളികൾ ദീപാവലി ആഘോഷത്തിന്റെ ഭാഗമായി പടക്കം പൊട്ടിച്ചതിനെ തുടർന്നാണ് തീപിടുത്തം ഉണ്ടായതെന്നാണ് സൂചന. എന്താണ് തീപിടുത്തത്തിന്റെ യഥാർഥ കാരണമെന്ന് സ്ഥിരീകരിച്ചിട്ടില്ല.
