എരുമേലിയിൽ ഓട്ടോറിക്ഷ മോഷണം ; എരുമേലി സ്വദേശികളായ രണ്ടു പ്രതികൾ പിടിയിൽ; പ്രതികളെ പിടികൂടിയത് മുണ്ടക്കയം പൊലീസ്

എരുമേലി: എരുമേലിയിൽ നിന്നും ഓട്ടോറിക്ഷ മോഷ്ടിച്ച കേസിൽ രണ്ടു പ്രതികളെ പൊലീസ് പിടികൂടി. എരുമേലി വില്ലേജിൽ പ്രൊപ്പോസ് കൊടിത്തോട്ടം ഭാഗത്ത് മലമ്പാറ വീട്ടിൽ കുട്ടപ്പൻ മകൻ സുനിൽകുമാർ (40), എരുമേലി വടക്ക് വില്ലേജിൽ, കരിനിലം കരയിൽ, പുലിക്കുന്ന് ഭാഗത്ത് പാറയ്ക്കൽ വീട്ടിൽ രാജൻ മകൻ, രാജേഷ് എന്ന് വിളിക്കുന്ന ഷിജി (39) എന്നിവരെയാണ് മുണ്ടക്കയം പൊലിസ് അറസ്റ്റ് ചെയ്തത്.

കഴിഞ്ഞ ദിവസം പകൽ 10 മണിയോടുകൂടി മുണ്ടക്കയം ചോറ്റി നിർമലാരം ഭാഗത്ത് റോഡ് സൈഡിൽ പാർക്ക് ചെയ്തിരുന്ന, ഇടക്കുന്നം പാറത്തോട് കുന്നുംഭാഗം ഭാഗത്ത് വെളളാപ്പളളിയിൽ വീട്ടിൽ സജു രാജുവിൻറെ ഓട്ടോറിക്ഷയാണ് പ്രതികൾ മോഷ്ടിച്ചത്.കേസിലെ പ്രതികളിലൊരാളായ സുനിൽകുമാറിനെ പൊലിസ് സ്ഥലത്ത് വച്ചു തന്നെ പിടികുടി. മറ്റൊരു പ്രതിയായ ഷിജി ഒളിവിൽ പോവുകയും ചെയ്തു.

ജില്ലാ പൊലീസ് മേധാവി കെ. കാർത്തിക്കിന്റെ നേതൃത്വത്തിൽ അന്വേഷണ സംഘം രൂപികരിക്കുകയും ഉടൻ തന്നെ ഷിജിയെ പിടികുടുകയുമായിരുന്നു. കാഞ്ഞിരപ്പളളി ഡി. വൈ.എസ്.പി. എൻ. ബാബുക്കുട്ടൻ മുണ്ടക്കയം സ്റ്റേഷൻ ഹൗസ് ഓഫിസർ ഇൻസ്‌പെക്ടർ ഷൈൻകുമാർ, സിവിൽ പൊലീസ് ഓഫിസർമാരായ ജോഷി എം തോമസ്സ്, ജോൺസൺ എ. ജെ, രഞ്ജിത്ത് പി.റ്റി, ബിജി വി ജെ, റോബിൻ തോമസ്സ്, എന്നിവരും അന്വേഷണ സംഘത്തിൽ ഉണ്ടായിരുന്നു. പ്രതികളെ കോടതിയിൽ ഹാജരാക്കി റിമാൻറ് ചെയ്തു.