ചങ്ങനാശേരി : തിരുവല്ലയിലും ചങ്ങനാശ്ശേരിയിലും കഞ്ചാവ് മൊത്ത കച്ചവടം നടത്തി വന്ന യുവാവിനെ ചങ്ങനാശ്ശേരി എക്സൈസ് സംഘം പിടികൂടി. അഞ്ച് കിലോ കഞ്ചാവുമായാണ് തിരുവല്ല സ്വദേശിയായ ഇയാളെ എക്സൈസ് സംഘം പിടികൂടിയത്. പത്തനംതിട്ട തിരുവല്ല പെരുന്തുരുത്തി തെങ്ങനാംകുളം വീട്ടിൽ വിഷ്ണുകുമാർ ടി കെയെയാണ് ചങ്ങനാശ്ശേരി എക്സൈസ് ഇൻസ്പെക്ടർ പ്രമോദ് റ്റിഎസ് എം പാർട്ടിയും ചേർന്ന് പിടികൂടിയത്. ഇയാളുടെ പക്കൽ നിന്നും വിൽപ്പനയ്ക്ക് എത്തിച്ച അഞ്ച് കിലോ കഞ്ചാവും പിടിച്ചെടുത്തു.
മാർച്ച് ഒന്നാം തീയതി ശനിയാഴ്ച രാത്രി 7 30 മണിക്ക് നാലുകോടി ഭാഗത്ത് വെച്ച് വിൽപ്പനയ്ക്കായി കൈവശം വെച്ചിരുന്ന 500 ഗ്രാം കഞ്ചാവുമായി ഇയാളെ എക്സൈസ് സംഘം പിടികൂടിയിരുന്നു. തുടർന്ന് ഇയാൾ വാടകയ്ക്ക് താമസിക്കുന്ന മല്ലപ്പള്ളി കുന്നന്താനം വള്ളമല വള്ളിയാംകുന്ന് വീട്ടിൽ നടത്തിയ പരിശോധനയിലാണ് കൂടുതൽ കഞ്ചാവ് കണ്ടെത്തിയത്. ഇവിടെ നിന്നും നാലു കിലോയിൽ അധികം കഞ്ചാവ് പിടിച്ചെടുത്തു. ഈ കേസിലെ പ്രതി മയക്കുമരുന്ന് മാഫിയയിൽ പെട്ട പ്രധാന കക്ഷിയാണ്. കേസിൽ പ്രതിയെ കൂടാതെ കൂടുതൽ ആൾക്കാർക്ക് പങ്കുണ്ടാകാമെന്ന് സംശയിക്കുന്നതായും അന്വേഷണം ആരംഭിച്ചതായും എക്സൈസ് അധികൃതർ അറിയിച്ചു.
അന്വേഷണ സംഘത്തിൽ അസി എക്സൈസ് ഇൻസ്പെക്ടർ ഗ്രേഡ് പി. സജി, പ്രിവൻ്റീവ് ഓഫീസർ ഗ്രേഡ്: സന്തോഷ് റ്റി., ആർ. രാജേഷ്, സിവിൽ എക്സൈസ് ഓഫിസർമാരായ രതീഷ്, പ്രവീൺ വനിതാ സിവിൽ എക്സൈസ് ഓഫീസർ സോണിയ എന്നിവർ പങ്കെടുത്തു.