കോട്ടയം : കോട്ടയം നഗര മധ്യത്തിൽ കാൽനടയാത്രക്കാരനെ ബൈക്ക് ഇടിച്ചു വീഴ്ത്തി. അപകടത്തിൽ കാൽനടയാത്രക്കാരനും ബൈക്ക് യാത്രക്കാരായ രണ്ടു യുവാക്കൾക്കും പരിക്കേറ്റു. അപകടത്തിൽ ഗുരുതരമായി പരിക്കേറ്റ തിരുവാർപ്പ് സ്വദേശിയായ കാൽനടയാത്രക്കാരനെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. എംജി സർവകലാശാല കലോത്സവത്തിൽ പങ്കെടുക്കാൻ എത്തിയ രണ്ട് യുവാക്കളാണ് ബൈക്കിൽ ഉണ്ടായിരുന്നതെന്നാണ് സൂചന. ശനിയാഴ്ച രാത്രി 11:30 യോടു കൂടി കെ കെ റോഡിൽ ധന്യാ രമ്യ തീയറ്ററിന് മുന്നിലായിരുന്നു അപകടം. സ്റ്റാർജങ്ഷൻ ഭാഗത്തുനിന്നും എത്തിയ ബൈക്ക് ധന്യ രമ്യ തിയേറ്ററിന് മുന്നിൽ റോഡ് മുറിച്ചു കടക്കുകയായിരുന്ന കാൽനടയാത്രക്കാരനെ ഇടിക്കുകയായിരുന്നു. ഇടിയുടെ ആഘാതത്തിൽ കാൽനടയാത്രക്കാരന്റെ കാൽ ഒടിഞ്ഞു തൂങ്ങിയിട്ടുണ്ട്. ബൈക്ക് യാത്രക്കാരന്റെ തലയ്ക്ക് ഗുരുതരമായി പരിക്കേറ്റിട്ടുണ്ട്. ഓടിക്കൂടിയ നാട്ടുകാരും പോലീസും ചേർന്നാണ് പരിക്കേറ്റവരെ ആശുപത്രിയിലേക്ക് മാറ്റിയത്. അപകടത്തെ തുടർന്ന് കെ കെ റോഡിൽ ഗതാഗത തടസ്സവും ഉണ്ടായി.
