കോട്ടയം: വൈക്കത്ത് സ്വകാര്യ ബസ് കണ്ടക്ടറെ യാത്രക്കാർ മർദിച്ചതിനെ തുടർന്നു വൈക്കം – എറണാകുളം റൂട്ടിൽ സ്വകാര്യ ബസ് സമരം. വൈക്കം റൂട്ടിൽ സർവീസ് നടത്തുന്ന ചെറുപുഷ്പം സ്വകാര്യ ബസിലെ കണ്ടക്ടർ നന്ദുവിനെയാണ് ഒരു സംഘം മർദിച്ചത്. സംഭവത്തിൽ പ്രതിഷേധിച്ച് സ്വകാര്യ ബസ് ജീവനക്കാർ പണിമുടക്കിയതോടെ യാത്രക്കാരും വലഞ്ഞു. വൈക്കത്ത് ബസ് സ്റ്റോപ്പിൽ വച്ചാണ് സ്വകാര്യ ബസ് ജീവനക്കാരന് മർദനമേറ്റത്.
ബസ് സ്റ്റോപ്പിൽ നിർത്തുന്നതിനിടെ മുന്നിൽ നടന്ന യാത്രക്കാരനെ ബസ് തട്ടി. ഇയാൾ റോഡിൽ വീണു. ഈ സമയം ബസിന്റെ കണ്ടക്ടർ നന്ദു പുറത്തിറങ്ങിയെത്തുകയും, സംഭവിച്ചത് എന്താണ് എന്നു ചോദിക്കുകയും ചെയ്തു. പരിക്കുണ്ടെങ്കിൽ ആശുപത്രിയിൽ പോകാമെന്നു നന്ദു യാത്രക്കാരോട് പറഞ്ഞു. ഇതിനിടെ അപ്രതീക്ഷിതമായി ക്ഷുഭിതരായ യാത്രക്കാർ നന്ദുവിനെ ആക്രമിക്കുകയായിരുന്നു. ആക്രമണത്തിൽ പരിക്കേറ്റ നന്ദുവിനെ ആശുപത്രിയിൽ പ്രവേശിപ്പിച്ചു. സംഭവത്തിൽ പൊലീസ് കേസെടുത്തു.
