കോട്ടയം: നഗര മധ്യത്തിൽ മലയാള മനോരമയ്ക്ക് മുന്നിലെ സിഗ്നൽ ലൈറ്റിൽ ബൈക്കുകളുടെ കൂട്ടിയിടി. സിഗ്നൽ തെറ്റിച്ച് എത്തിയ ബൈക്ക് ചെല്ലിയൊഴുക്കം റോഡിൽ നിന്ന് എത്തിയ സ്കൂട്ടറിൽ ഇടിക്കുകയായിരുന്നു. അപകടത്തിൽ തമിഴ്നാട് സ്വദേശി നാഗരാജു (22) , വയനാട് സ്വദേശി സാംജിത്ത് (28) എന്നിവർക്ക് പരിക്കേറ്റു. ഗുരുതരമായി പരിക്കേറ്റ നാഗരാജുവിനെ കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി. വ്യാഴാഴ്ച രാത്രി എട്ടുമണിയോടുകൂടി മലയാള മനോരമയ്ക്ക് മുന്നിലെ സിഗ്നൽ ലൈറ്റിലായിരുന്നു അപകടം. കളക്ടറേറ്റ് ഭാഗത്തുനിന്നും എത്തിയതായിരുന്നു നാഗരാജു. ഈ സമയം സിഗ്നൽ ലൈറ്റ് ചുവപ്പ് സിഗ്നൽ തെളിഞ്ഞ് നിൽക്കുകയായിരുന്നു. ഇത് വകവയ്ക്കാതെ മുന്നോട്ടു എടുത്ത നാഗരാജുവിന്റെ ബൈക്ക്, ചൊല്ലിയൊഴുക്കം റോഡിൽ നിന്നും ഇരയിൽ കടവ് ബൈപ്പാസ് ഭാഗത്തേക്ക് പ്രവേശിച്ച സാംജിത്തിന്റെ സ്കൂട്ടറിൽ ഇടിക്കുകയായിരുന്നു. ഇടിയുടെ ആഘാതത്തിൽ രണ്ടുപേരും റോഡിൽ തെറിച്ചു വീണു. ഓടിക്കൂടിയ നാട്ടുകാർ ചേർന്നാണ് പരിക്കേറ്റ രണ്ടുപേരെയും ജില്ലാ ജനറൽ ആശുപത്രിയിൽ എത്തിച്ചത്. നാഗരാജുവിന്റെ തലയ്ക്കാണ് പരിക്ക്. ഗുരുതരമായി പരിക്കേറ്റ ഇയാളെ കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി. സാംജിത്തിനും സാരമായി പരിക്കേറ്റിട്ടുണ്ട്. അപകടത്തെ തുടർന്ന് കെ കെ റോഡിൽ ഗതാഗത തടസ്സവും ഉണ്ടായി.
