കോട്ടയം : മൂലവട്ടം കടുവാക്കുളത്ത് ബൈക്കിൽ ഇടിക്കാതിരിക്കാൻ വെട്ടിച്ചു മാറ്റുന്നതിനിടെ നിയന്ത്രണം നഷ്ടമായ കാർ റോഡരികിൽ തലകീഴായി മറിഞ്ഞു. കാർ വരുന്നത് കണ്ടു വെട്ടിച്ചു മാറ്റിയ ബൈക്ക് റോഡിൽ മറിഞ്ഞ് രണ്ടുപേർക്ക് പരിക്കേറ്റു. അപകടത്തിൽ കളത്തിക്കടവ് സ്വദേശികളായ ആഷിക് , ബിജിൻ എന്നിവർക്ക് പരിക്കേറ്റു. ചൊവ്വാഴ്ച രാത്രി 11.45 ഓട് കൂടിയായിരുന്നു അപകടം. കൊല്ലാട് ഭാഗത്തുനിന്നും എത്തിയതായിരുന്നു ബൈക്ക്. കോട്ടയം ഭാഗത്ത് നിന്ന് വരികയായിരുന്നു കാർ. കടുവാക്കുളത്തിന് സമീപത്തെ വളവിൽ വച്ച് എതിർ ദിശയിൽ നിന്നും ബൈക്ക് വരുന്നത് കണ്ട് വെട്ടിച്ചു മാറ്റിയ കാർ റോഡരികിലെ പുല്ലിൽ കയറി തെന്നി കല്ലിൽ ഇടിച്ച് മറിയുകയായിരുന്നു. ഓടി കൂടിയ നാട്ടുകാർ ചേർന്ന് കാറിന്റെ ഡോർ തല്ലിത്തകർത്താണ് യാത്രക്കാരെ പുറത്തെടുത്തത്. കാർ വരുന്നത് കണ്ട് വെട്ടിച്ചു മാറ്റിയ ബൈക്ക് റോഡിൽ മറിഞ്ഞാണ് രണ്ടുപേർക്കും പരിക്കേറ്റത്. പരിക്കേറ്റ രണ്ടുപേരെയും ജില്ലാ ജനറൽ ആശുപത്രിയിൽ പ്രവേശിപ്പിച്ചു.
