കോട്ടയം: സ്വകാര്യ ബസിനുള്ളിൽ വിദ്യാർത്ഥിനിയോട് മോശമായി പെരുമാറിയതായി ആരോപിച്ച് ബസ് കണ്ടക്ടർക്ക് മർദനമേറ്റ സംഭവത്തിൽ പോക്‌സോ കേസിൽ പ്രതി ചേർക്കപ്പെട്ട കണ്ടക്ടർക്ക് ജാമ്യം. തിരുനക്കരയപ്പൻ എന്ന സ്വകാര്യ ബസിലെ കണ്ടക്ടർ പൂവൻതുരുത്ത് സ്വദേശി പ്രദീപിനാണ് കോട്ടയം അഡീഷണൽ ജില്ലാ കോടതി ഒന്ന് പോക്‌സോ കോടതി ജഡ്ജി എം. നിക്‌സൺ മുൻകൂർ ജാമ്യം അനുവദിച്ചത്. സ്വകാര്യ ബസിൽ യാത്ര ചെയ്യുകയായിരുന്ന പെൺകുട്ടിയോട് മോശമായി പെരുമാറിയെന്നാരോപിച്ച് ഒരു സംഘം ആളുകൾ ചേർന്ന് പ്രദീപിനെ ബസിനുള്ളിൽ വച്ച് വലിച്ചിറക്കി മർദിക്കുകയായിരുന്നു. എസ്.ടി ചോദിച്ചതിനെച്ചൊല്ലിയുള്ള തർക്കമാണ് സംഘർഷത്തിലും കയ്യേറ്റത്തിലും കലാശിച്ചത്. തുടർന്നാണ് പ്രദീപ് ചിങ്ങവനം പൊലീസ് സ്റ്റേഷനിൽ മർദിച്ചവർക്ക് എതിരെ പരാതി നൽകിയത്. എന്നാൽ, മർദിച്ചവരെ അറസ്റ്റ് ചെയ്യാതിരുന്ന പൊലീസ്, പ്രദീപിനെതിരെ പെൺകുട്ടിയുടെ പരാതിയിൽ പോക്‌സോ കേസ് രജിസ്റ്റർ ചെയ്യുകയും ചെയ്തു. ഈ കേസിലാണ് കോടതി ഇപ്പോൾ പ്രദീപിന് മുൻകൂർ ജാമ്യം അനുവദിച്ചിരിക്കുന്നത്.പ്രതികൾക്കായി അഡ്വ.വിവേക് മാത്യു വർക്കി , അഡ്വ.കെ.എസ് ആസിഫ് എന്നിവർ ഹാജരായി.
കോട്ടയം പാക്കിൽക്കവലയിൽ സ്വകാര്യ ബസിനുള്ളിൽ കണ്ടക്ടർക്ക് മർദനമേറ്റ സംഭവം; കണ്ടക്ടർക്ക് എതിരെ ചുമത്തിയ പോക്‌സോ കേസിൽ മുൻ കൂർ ജാമ്യം; പോക്‌സോ ചുമത്തിയത് ‘നിന്നെ കണ്ടാൽ സ്‌കൂളിൽ പോകുന്നതാണെന്നു പറയില്ലല്ലോടി’ എന്നു പരാമർശിച്ചതായി ആരോപിച്ച്
