കോട്ടയം : കോട്ടയം നഗര മധ്യത്തിൽ കെ കെ റോഡിൽ മലയാള മനോരമ ജംഗ്ഷനു മുന്നിൽ അമിതവേഗത്തിൽ എത്തിയ സ്വകാര്യ ബസ് ബൈക്ക് യാത്രക്കാരനെ ഇടിച്ചു വീഴ്ത്തി. സ്വകാര്യ ബസ്സിന് അടിയിൽ കുടുങ്ങിയ ബൈക്കും യാത്രക്കാരനെയും മീറ്ററുകളോളം വലിച്ചു നീക്കി. ഗുരുതരമായ പരിക്കാ യാത്രക്കാരനെ നാട്ടുകാർ ചേർന്ന് ജില്ല ജനറൽ ആശുപത്രിയിൽ പ്രവേശിപ്പിച്ചു. ഗുരുതരമായി പരിക്കേറ്റ് അബോധാവസ്ഥയിൽ ആയ യാത്രക്കാരനെ , പ്രഥമ ശുശ്രൂഷകൾ നൽകിയശേഷം കോട്ടയം മെഡിക്കൽ കോളേജ് ആശുപത്രിയിലേക്ക് അയച്ചു. ഇയാളെ തിരിച്ചറിഞ്ഞിട്ടില്ല.
ചൊവ്വാഴ്ച രാവിലെ ഏഴരയോടുകൂടിയായിരുന്നു അപകടം. കോട്ടയം ഏറ്റുമാനൂർ റൂട്ടിൽ സർവീസ് നടത്തുന്ന പുള്ളത്തിൽ എന്ന സ്വകാര്യബസ്സാണ് അപകടത്തിൽപ്പെട്ടത്. ഈരയിൽ കടവ് ഭാഗത്ത് നിന്നും പ്രധാന റോഡിലേക്ക് ഇറങ്ങിവന്ന ബൈക്കിനെ ലോഗോസ് ജംഗ്ഷൻ ഭാഗത്തുനിന്നും അമിതവേഗത്തിൽ എത്തിയ ബസ് ഇടിക്കുകയായിരുന്നു. അടിയിൽ കുടുങ്ങിയ ബൈക്കുമായി മീറ്ററുകളോളം ദൂരം ബസ് നിരങ്ങി നീങ്ങി. ഓടിക്കൂടിയ നാട്ടുകാർ ചേർന്നാണ് പരിക്കേറ്റ യാത്രക്കാരനെ പുറത്തെടുത്തത്. അപകടത്തെ തുടർന്ന് കെ കെ റോഡിൽ ഗതാഗതക്കുരുക്കും ഉണ്ടായി.
